KUCHING: Kepala Menteri Datuk Patinggi Tan Sri Adenan Satem nyemetak madah semina chalun ke ulih menang aja deka dipilih ngarika Barisan Nasional (BN) di sitak Marudi ba Pengawa bepilih besai nengeri (PRN) tu ila.
Bejaku ngagai pemberita pengudah ngulu aum komiti tinggi Parti Pesaka Bumiputera Bersatu (PBB) kemari, iya ke mega Presiden PBB enggau Chairman BN Nengeri madah pekara nya berat ngambi tau nentuka BN mengkang ulih menang di Marudi.
“Kitai deka milih chalun ke sigi ditemu ulih menang lalu nya meh pekara ti dikemerat BN Nengeri.
“Nya alai, kitai enggai milih chalun ari gempung parti ti tau ngujungka BN alah ,”ku Adenan.
Sitak Kunsil Nengeri (DUN) Marudi entara seiti sitak angat rambau PRN tu ila pengudah Parti Demokratik Progresif Sarawak (SPDP) ti diuluka Presiden iya Datuk Seri Tiong King Sing enggai meri sitak nya ngagai Parti Tenaga Rakyat Sarawak (TERAS).
Ba sitak nya, TERAS ke nyadi parti pro-BN diarika penyandang ke mega Menteri Muda Betanam Betupi Datuk Sylvester Entrie Muran ti menang ba penuduk nya nengeh tikit SPDP ba PRN 2011 suba.
Entrie begulai enggau empat ketuai dalam SPDP nyengkaum presiden sida (maya nya) Tan Sri William Mawan numbuhka TERAS taun 2014, angkat ari SPDP ketegal penyarut dalam parti.
Kelimpah ari Marudi, SPDP mega enda ngelengka empat sitak bukai ngagai TERAS iya nya Pakan ke benung dipegai Mawan, Tasik Biru (Datuk Peter Nansian), Bekenu (Rosey Yunus) enggau Batu Danau (Paulus Palu Ngumbang).
Sekretari Mendam Opis Menteri Perintah Menua Datu Dr Penguang Manggil udah dikenukuka Tiong deka ngarika SPDP ba sitak nya.-Borneo Post
Post a Comment