KUCHING: Kepala Menteri Datuk Patinggi Tan Sri Adenan Satem enda benadaika, nyangka bisi antara komponen parti Barisan Nasional (BN) di nengeri tu deka besilih penuduk tauka sitak maya Pengawa Bepilih Besai Menua ti ke-11(PRN11) tu ila.
Adenan ti mega Chairman BN Sarawak taja pia madah, pekara nya bedau diputus laban pengawa beduaka penuduk ungkup parti dalam komponen BN nengeri bedau ditetapka.
“Nyangka bisi besilih penuduk ba sekeda sitak entara parti dalam komponen BN maya PRN11 tu ila,” ku iya lebuh aum media pengudah bejadika Bup Autobiography ‘Anak Kampong’ ditulis ex-Kaban Kunsil Nengari ti mega Ketuai Indu Parti Sa’ati Rayat Sarawak (SUPP) Lily Yong Lee Lee ba sebengkah hotel ditu, ensana.
Taja pia, Adenan madah, pekara magi penuduk nya dijangka tembu sebedau hari nganjung nama chalun PRN 11 tu ila.
Lebuh ditanya baru enti iya (Adenan) betapi enggau penanggul magi kerusi ungkup empat parti politik, SPDP enggau TERAS sereta SUPP enggau UPP ke benung charut diatu, ku Adenan:
“Aku nadai penanggul enggau Parti Pesaka Bumiputera Bersatu (PBB), Parti Rayat Sarawak (PRS),” ku iya.
Adenan ti mega Presiden PBB madah PRN11 tu ila, dijangka deka digaga pengabis laun 20 Jun tu, lalu sebedau nya BN deka mantaika sapa mua baru ke deka bediri maya PRN11.
“BN deka mantaika mua baru, ambika chunto, 40 kerusi ke deka alai PBB bediri, lima mua baru deka bediri di lima kerusi baru lalu sekeda penyandang ke diatu, bisi udah madah enda bediri agi tang naka diatu pemayuh nya enda ulih dipadah dulu,” ku iya.
Lebuh ditanya pasal penyandang sitak Layar ke dipangku Sapit Kepala Menteri Datuk Patinggi Tan Sri Alfred Jabu sekalika iya agi bediri ngetanka sitak nya nengah BN-PBB, ku Adenan:
“Enggai aku nimbal laban enda nemu pekara nya,” ku iya.-BorneoPost
Post a Comment