KUCHING: Kepala Menteri ke mega nyadi Chairman Barisan Nasional Nengeri (BN) Datuk Patinggi Tan Sri Adenan Satem enda ngenadaika pekara sentang Kaban Parlimen (MP) Sarawak deka betukar penuduk enggau Kaban Kunsil Nengeri (ADUN) maya Pengawa Bepilih Besai Nengeri ke-11 (PRN 11) tu ila.
Adenan ti mega nyadi Presiden Parti Pesaka Bumiputera Bersatu (PBB) madah, pengawa besilih penuduk nya digaga berindik ari sekeda penyandang ke diatu ti udah setuju nyurutka diri laban deka meri peluang ngagai mua baru bediri maya PRN 11.
“Dipelaba bisi antara MP deka dipindahka ngagai Kunsil Nengeri (DUN) maya PRN 11, ba sekeda sitak. Taja pia, pekara tu benung diperunding silik ngambi ulih nyikap bala chalun ke dikearap ulih menang.
“BN Sarawak mega bedau mutuska rintai nama chalun laban bisi sekeda pekara patut diputar enggau manah kelebih agi ba parti gempung BN nyengkaum Parti Pesaka Bumiputera Bersatu (PBB),” ku Adenan.
Iya madah munyi nya ba aum media pengudah bechairmanka Aum Pemesai Renggat Tinggi PBB di Indu Opis PBB di Jalai Bako ditu, kemari.
Sama bisi enggau ngulu aum nya, kededua Sapit Presiden PBB ke mega nyadi Sapit Kepala Menteri Datuk Patinggi Tan Sri Alfred Jabu anak Numpang enggau Menteri Pengawa Berumah enggau Dagang Temuai,Datuk Amar Abang Johari Tun Openg.
Ba penuduk Kunsil Nengeri (DUN) Bukit Saban, Betong, berita ngerimbas pending bisi madahka Menteri Kebun Dandang Besai enggau Komoditi ti mega nyadi MP Betong, Datuk Amar Douglas Uggah anak Embas diperitaka deka ‘dibai’ pulai nyadi ADUN lalu deka diasuh bediri di sitak Bukit Saban, lalu penyandang kediatu, Menteri Muda Pengintu Pengelantang Pendiau Robert Lawson Chuat deka diasuh nukar penuduk Uggah, lalu disaut Adenan, iya enda ngenadaika pekara nya.
“Tau nyadi bansa nya ba sebarang sitak,” ku iya ke nadai nyemetak sapa bagi ke deka besilih penuduk.
Kelimpah ari nya, Adenan netapka rintai chalun penuh semua parti gempung BN Sarawak nyangka deka dibantaika sebedau pengawa nganjung nama chalun PRN 11.-Borneo Post
Post a Comment