KUCHING: Raban ketuai ba renggat baruh di konstituensi Engkilili dilalau ngambika terus taluk ngagai perintah nengeri tu ke dipegai Barisan Nasional (BN) lebih agi maya Pengawa Bepilih Besai Nengeri (PRN) tu ila.
Kaban Kunsil Nengeri (ADUN) Engkilili Dr Johnical Rayong Ngipa madah, ketuai renggat baruh nyengkaum sida pemancha, penghulu, kaunselor, kapitan enggau tuai-tuai rumah endang ejen pengatur pengawa perintah, nya alai sida patut chakah ngempuruka rayat ngambika terus nyukung perintah.
“Kita endang jematan antara perintah enggau rayat, nya alai tanggungpengawa kita besai amat kelebih agi matak rayat nyukung perintah nengah pengari rayat awak ulih ngetanka penuduk dipenggi BN maya PRN tu ila.
Iya madah munyi nya rambau aum ninting taun Gerempung Tuai Rumah (PTR) Bagi Menua Betong di Opis Pelilih Betong, di Betong kemari.
Nangkan nya, ku iya ketuai raban bansa patut pintar matak sukung nembiak redak ke dipegai sida lalu anang sesekali ngemulaka rayat ke udah milih sereta ngandalka sida nyadi ketuai.
“Taja kes baka nya jarang nyadi tang kitai enda nyamai enda nyebut laban pengawa bepilih nyau majak sempil,” ku iya seraya madah diri deka diangkat nyadi chalun bediri Engkilili.
“Aku minta kita terus nyukung aku sereta meri perais ngagai Kepala Menteri Datuk Patinggi Tan Sri Adenan Satem ngambika ulih menang besai, lalu neruska pemujur pengawa iya ngiring nengeri tu,” ku iya.
“Beri mih awak ngagai Adenan sepenggal agi ngiring nengeri tu…enti sayauka Sarawak pilih mih chalun BN lalu anang ngundi penyakal.
Berebak enggau nya, Chairman PTR Betong ke baru dipilih Michael Willie besemaya deka bejalaika tanggungpengawa nya enggau manah.
“Aku mega ngarika bala tuai rumah ditu deka bebendar gawa ungkup perintah kelimpah terus nyukung Dr Rayong ngetanka penuduk ditu.
“Kami agi begunaka pemansang, nya alai kami nadai pilih bukai kelimpah ari nyukung perintah ti betuaika Adenan,” ku iya seraya madah peti undi di Bangat, Lidong enggau Tabut endang tetap dipenggi BN.
Dulu ari nya, Dr Rayong bisi nyuaka setipikit tuai rumah ungkup dua taun ngagai lapan iku tuai rumah ba endur nya.
Iya mega bisi nyuaka geran MRP ngagai urung 35 Komiti Pemansang enggau Pengelikun Genturung Pendiau sereta gerempung indu ari Bangat, Lidong, Skrang Ili, Enteban, Kubal enggau Tisak penyampau RM235, 000.
PTR Betong mega nerima geran RM10,000 dikena sida ngatur program ungkup taun tu.-Borneo Post
Post a Comment