DAP Sri Aman nyaup sekeda belanja kena merubat Aasheena di SGH ditu

KUCHING: Penusah seiti ruang bilik ari San Demam, Sri Aman merubat anak mit seduai Aasheena Lutang anak Darwin (11 bulan) dikelempung nengah bantu DAP Sri Aman.

Bantu duit diberi Chairman DAP Sri Aman Leon Jimat Donald kena melanja pejalai Lily anak Isa enggau laki iya, Darwin mai Aasheena bebuntas di Sepital Besai Sarawak (SGH).

Nitih penerang ari Lily, anak iya nya bisi penanggul enda ulih bira kenyau beumur sebulan lalu udah kala dibuntas di Kuching enggau Kuala Lumpur dulu suba.

“Taja pan udah dua kali bebuntas, pemedis Aasheena meruan baka selama, di SGH ditu ketiga kali mih iya dibuntas,” ku Leon nengah sepuchuk surat penerang berita.

Leon nambah, Darwin ke mega Tuai Rumah San Demam kala minta bantu ngagai MP enggau ADUN tang pinta iya enda dikeibuh kededua pengari rayat nya.

Ketegal Darwin seiku tuai rumah, kededua pengari rayat nya ngasai iya ulih mayar kos berubat, tandu Leon.

“Nitih penerang ari Darwin, iya enda kala nerima elawin tuai rumah taja pan udah dichiri bala anembiak nyadi tuai rumah betaun ke udah,” ku Leon seraya madah rumah panjai San Demam ke di baruh pegai Darwin bisi 22 pintu.

Leon ke mega Mandal Chairman DAP Nengeri madah, ketegal mayuh pemar ditapi peranak Sri Aman ba sentang servis pengerai, pengawa ngaga spital baru Sri Aman patut dikelengkas.

“Kededua pengari rayat ditu baka ke bengal sereta, enti ditanya sentang pejalai pengawa ngaga sepital baru, seduai enda kiruh ke pinta rayat,” ku Leon.

Leon madah, nyentuk diatu mengkang nadai sebarang pengawa dipejalai lalu penusah rayat baka sida Aasheena sebilik deka terus tusah, muai belanja besai beperesa sereta berubat ke Kuching belama.

“Nama kebuah pengawa bebuntas dipejalai di Kuching lalu ukai di Sepital Sri Aman, sekalika bala lutur di Sri Aman enda chukup pengelandik ngereja pengawa nya,” ku Leon sambil madah pemar ba pekara tu patut diketu.

Rayat patut berunding dedalam, nengah chara demokratik maya PRN nama ke patut dikena ungkup pengari rayat ke semina nemu bejaku sereta besemaya lebuh pengawa bepilih, tandu Leon.

Barang sapa ti deka meri bantu ngagai Aasheena tau betelefon nuju Lily nengah lumur 012- 827 3702 tauka ngemasuk belanja dalam Akaun Bank Rakyat No: 22-090-118404-3.-Utusan Borneo