SAMARAHAN: Menteri ba Opis Menteri Besai Nancy Shukri madah, Sarawak tebal agi ngemeranka politik pemansang, ukai pekara politik mit bukai ti malut politik Sarawak.
“YAB Kepala Menteri kami ngenggaika parti bukai datai kitu (penyakal) ke lebih agi parti ari luar Sarawak. Sida enda nemu adat kami ditu, penatai sida iya semina deka ngemansut jaku ti ngemediska ati rayat.
“Sida (penyakal) enda nemu bakani kami ngelama tu udah ngemeranka adat dikena masa orang bukai kenyau ari ari kelia, neritka kaul ba rayat enda ngira bansa sereta jalai pengarap, di serata menua Sarawak.
“Tau peda kediri bakani kami masa temuai ari luar ke datai kitu” ku Nancy.
Iya madah munyi nya lebuh bejaku ba program ‘Berambeh Bersama Rakyat’ di Rumah Panjai Sungai Buluh di sitak Sadong Jaya semak ditu, kena Hari Dua tu tadi.
Naka ke diatu, penyampau pengundi ke udah ngerijista diri di sitak Batang Sadong manggai urung 21,316 iku.
“Tu siti pemar ba pengawa ngemansangka rayat kami ngambika sida iya ulih mindah ari siti endur ngagai siti endur,” ku iya.
Nya alai ku iya, politik di Sarawak agi ngemeratka politik pemansang.
Lebuh ngenang pasal banding pemansang di menua pesisir ditu enggau di Semenanjung, Nancy madahka Tuai Rumah ba sesebuah rumah panjai seruran ngenataika sebana sida ngagai pengari rayat sida.
“Sida di menua pesisir suah ngenataika penanggul enggau pinta sida ngagai YB, lalu kami deka mantaika peminta sida tu baik nya di renggat menua tauka di parlimen.
“Kami ngarapka Perintah Besai nyukung peminta kami. Kami beratka pemansang laban enti dibanding enggau Semenanjung, sida maju agi ari kami ditu. Nya mih kebuah kami enda ngengetu minta, mai pekara tu ngagai Perintah ke bisi bekaul enggau sitak kami,” ku iya.
Kelimpah ari nya, Nancy mega minta Tuai Rumah Panjai Sungai Buluh, Sili anak Bunsi nulis surat ngagai iya bekaul enggau pinta duit jali rumah panjai ti udah dikemendarka perintah besai apin lama udah.
Rumah Panjai Sungai Buluh bisi 89 pintu, beridup ba pengawa betanam betupi sereta berikan.
Kelimpah ari nya, nengeri Sarawak ngemeranka politik ti ulih bebatak asur laban ke diuan mayuh macham pupu bansa enggau jalai pengarap ngambika rayat ulih begulai likun enggau pangan diri.
Dulu ari nya, ADUN Sadong Jaya, Ir Aidel Lariwoo dalam udah ngemendarka projek ngaga dua buah jematan besai ke beungkus RM3 juta, jalai alun nguju rumah panjai nya (RM250,000), parit semin (RM100,000) enggau padang alai nembiak bemain futsal (RM150,000).
Sama bisi ngulu atur pengawa nya, Ketuai Indu BN renggat nasional Datuk Seri Shahrizat Abdul Jalil, Speaker Dewan Negara Datuk Senator Doris Sophia Brodie, Kaban Parlimen (MP) Kota Samarahan Rubiah Wang, Tuai Rumah Rh Panjai Sungai Buluh Sili anak Bunsi, bal tuai opis perintah bukai sereta raban indu komponen parti BN ari serata menua.-BORNEO POST
Post a Comment