SRI AMAN: Menteri ba Opis Menteri Besai ke mega Sapit Presiden Parti Rakyat Sarawak (PRS), Datuk Joseph Entulu Belaun ngelalau rayat di kandang menua pesisir ngambika enda kelalu gagit nitihka arus politik di mengeri ke ketebal dikuasa piak penyakal.
Ku iya, kebuah pia,kandang menua pesisir agi tubah begunaka pemansang, ke diatu semina ulih dipejalaika perintah ti diketuaika komponen parti Barisan Nasional (BN).
Beduduk ari nya, rayat di menua pesisir anang sesekali nitihka singkang politik mengeri laban pemansang di mengeri jauh udah nyulut enti dibandingka enggau pemansang di kandang menua pesisir.
“Nya alai, sukung mih BN kena nentuka kita ke diau di menua pesisir terus mansang, nyingkang sebaka enggau peranak di kandang mengeri.
“Berebak enggau nya anang alah umbuk politik penyakal di mengeri ti nyata udah ngasaika pemansang jauh manah enti dibanding enggau peranak menua pesisir ngelama tu,” ku iya.
Entulu mansutka jaku nya maya bejaku ngarika Opis Menteri Pemansang Tanah, Tan Sri Datuk Amar Dr James Jemut Masing bejadika Balai Mensia Mayuh Guna di Sri Aman, ditu, .
Ku Entulu, rayat patut nemu penerang sentang pengawa projek pemansang iya ke dibai perintah enti dibanding semina macha berita sensasi di media rama.
“Rayat patut nemu pasal projek pemansang perintah beungkus bebiliun ringgit ari ke macham berita selebubu ngapa di media rama ke suah bejai pengawa pemesai perintah enggau nadai bukti ke nyenggala.
Bela bisi datai rambau pengerami nya, Sapit Menteri Pekara Dalam Menua, Masir Kujat, Menteri Muda Pemansang Menua Pesisir enggau Pengawa Berumah, Datuk Francis Harden Hollis, Menteri Muda Pengawa Betanam Betupi, Datuk Mong Dagang, Kaban Parlimen (MP) Ulu Rajang, Wilson Ugak Kumbong, ADUN Balai Ringin, Snowdan Lawan, raban pemesai perintah, raban ketuai komuniti ngelingi pelilih Sri Aman.
Nyempulang pengerami nya, Entulu mega nerima sepenyampau 199 pom peminta nyadi kaban baru masuk PRS Sitak Kunsil Nengeri (DUN) Bukit Begunan.-Borneo Post
Post a Comment