KUCHING: Perintah Sarawak meri sukung ke penuh ngagai Malaysia nyereta ‘Perjanjian Perkongsian Trans-Pasifik (TPPA)’,ti dipelabaka deka dipejalaika dalam taun 2018 nyema dipesetuju.
Kepala Menteri Datuk Patinggi Tan Sri Adenan Satem madah, udah datai ba timpuh ke patut menua tu nyereta TPPA.
“Kitai nyukung TPPA.
“Kitai nadai pilih bukai, lalu aku ngasaika nya pilih ti pemadu manah sereta mayuh agi pengelebih dibandingka enggau pengelemi.
“Tetiap menua di dunya diatu udah sebagi ari dagang dunya, nya kebuah enda tau ninggalka diri enggaika baka menua Korea Utara,” ku iya.
Iya mansutka pekara lebuh nyimpul jurai maya Sesi Mei Penerang Pasal TPPA ari Menteri Dagang Antarabansa Enggau Industri (Dato Sri Mustapa Mohamed) begulai enggau Kepala Menteri, Menteri Kabinet sereta ADUN Sarawak, ti diatur ba Bilik Gerakan,Wisma Bapa Malaysia ditu,kemari.
Bekaul enggau nengeri tu ku iya, nya sempekat semaya entara menua di baruh konstitusyen.
Sekalika nengeri tu bisi kena pangka tauka enda, udah tentu deka bisi kena tang konsultasi pasal nya (TPPA) enda tau enda diatur, ku iya
“Pasal pekara ti nyiping Bumiputera, aku ngasaika kitai udah mujur nyeliah bekaul enggau Dasar Ekonomi Baru (DEB) ti enda ngeruga Bumiputera baka diatu.
“Ba pekara tanah, kitai deka meda sekali relevan tauka enda. Aku ngasaika TPPA enga ngeruga rega tanah,” ku iya.
Ngenang pekara nya baru iya madah, TPPA deka dikena tauka dikemeranka jemah ila. Kompeni multinasional kitai deka diberi hak kuasa ngaga polisi.
“Enti kitai ngubah polisi kitai setengah jalai, nya ulih ngeruga kompeni korporat multinasioal kitai, sida bisi hak mantaika bantah.
“Taja pia, ketegal ‘mass comunication’ enggau globalisasyen, kitai enda tau enda bisi raban bansa makit tebuka.
“Dalam sejarah Malaysia, kenyau ari pun, kitai ngelama tu endang sebuah menua dagang ukai betatak,” ku iya seraya nandu baru madahka menua tu udah lama bedagang.
Sama bisi datai mendingka licha bekaul enggau TTAP nya kemari, Sapit Menteri Dagang Antarabansa enggau Industri Datuk Ahmad Maslan, Speaker Kunsil Nengeri, Datuk Amar Mohamad Asfia Awang Nassar sereta menteri kabinet enggau bala Kaban Kunsil Nengeri.-Borneo Post
Post a Comment