KUCHING: Menteri Pemansang Rama Tan Sri William Mawan Ikom meransang semua Tuai Rumah di Saratok nyadi kaban Gerempung Tuai Rumah Saratok (ALCS) ngambika sida ulih mantaika penemu sida nengah siti gerempung.
Diatu ALCS bisi lebih 100 iku kaban nyengkaum 11 iku tuai rumah indu.
Mawan ti mega presiden Sarawak Dayak National Union (SDNU) arapka SDNU menua nya enggau pampang indu Serakup Indu Dayak Sarawak (SIDS) begempung enggau mayuh bengkah gerempung Dayak baka ALCS nyapai sereta ngetanka penyerakup rama.
Iya mega ngelalau ALCS regas agi mai pemaik ti positif ngagai komuniti menua nya kelebih agi chakah nyerakup raban nembiak enggau orang tuai ari baruh SDNU.
“Suah agi baum sereta nemuai, betemu sereta besaum penemu enggau bala bukai, pendingka penanggul rayat lalu kenataika pekara ti udah dipesetuju kita ngagai aku. Tu deka meri pengasi ba pekara bejalaika projek pemansang,” ku iya madah ngagai exco enggau kaban ALCS sereta SDNU Saratok lebuh ti meri penemuai basa ngagai iya ba opis iya di Masja Petra Jaya ditu apin lama udah.
Raban temuai nya mega lalu meri penerang ngagai Mawan sentang pemansang pengawa ngemanahka Rumah Dayak Saratok. Mawan meri RM100,000 ngagai kaban komiti nya ngambika bisi dikena ngemanahka Rumah Dayak nyengkaum masang ‘aircond’. Iya mega meri geran RM100,000 ngagai gerup ke sama ngambika bisi dikena nyeruri sereta ngemanahka dewan.
Rumah Dayak ti udah ditumbuhka pengelama 30 taun di empu SDNU, beguna amat lalu nyadika kelai komuniti Dayak di Saratok.
Mawan ti mega Kaban Parlimen Saratok nengah awak nya lalu nyuaka geran RM40,000 ari perintah ditangkan enggau SDNU Saratok sereta SIDS Saratok ti sama nerima RM25,000.
Insol ti mega Sekretari ALCS nguna wak nya meri penerang ngagai Mawan sentang isu nyiri sereta nyiri baru Tuai Rumah di Saratok. Iya mega madahka ALCS begunaka opis enggau lengkas ngambika sida ulih bejalaika pengawa engagu ngasi agi. Iya besemaya deka ngemaruka penerang agi perintah ba awak ke semak tu nyengkaum pengurang penyikap perengka guna ba sekeda kandang endur.
Sama bisi enggau nemuai maya nya Kaunsilor Tuai Rumah Insol Untang, Penghulu Isa Geng, Jeti Kumpai Endawie, Cr Dom Silang, siku orang dagang James Jimbun ti mega kaban SDNU.-Borneo Post
Post a Comment