Dennis ngelaluka pengajar ari menua bukai ngajar di Baram

MIRI: Raban pengajar ari sebarang nengeri di Malaysia, nadai ngira bansa sereta jalai pengarap dilaluka ngajar ba menua Baram.

Kaban Kunsil Nengeri (ADUN) Telang Usan, Dennis Ngau madah, endang udah nyadi tanggungpengawa raban pengajar nyeridi sereta nempa pengidup raban nembiak rebak baru lalu pengawa sida tu patut dipebasaka.

“Anang bekenangka pekara ke kala nyadi ba nengeri tu. Di Baram, enti sema kita kitu deka ngajar bala anak kami, penatai kita endang dilaluka kami.

“Nyadi pengajar, semua kita ulih begulai bejalaika pengawa dikena ngangkatka standard pelajar di Baram, lalu tu pengawa ke manah ku iya rambau pengerami Malam Meri Basa Ngagai Pengajar Pelilih Baram.

Pengerami makai lemai nya digulu raban pengajar sereta staf sekula ari mayuh bengkah sekula di Baram.

Sama bisi datai iya nya Pemesai Pelajar Baram, Seripah Azizah Wan Hussain sereta Sapit Pemesai Pelajar Baram, Jalong Wan.

Kelimpah ari nya, Dennis mega meri besai terima kasih ngagai pengajar ke ngajar di Baram laban udah bebendar sereta dedikasyen bejalaika pangku pengawa sida nyungkak pemanah pemutus peresa UPSR taun tu.

“Aku dipadahka pemutus peresa UPSR taun tu nyulut agi enti dibandingka enggau taun seiti nyin kemari.

“Tu pemujur dijapai asil ari kerejasama entara raban pengajar, apai indai sereta mega nembiak nya empu.

“Aku ngarapka kerejasama ke bansa tu ulih dikemeranka ngambika kitai ulih neruska penyulut bala anak dalam pelajar.

“Pia mega, kita (pengajar) nyadi raban ketuai ke nadai sebarang nama, laban kita ngiring nembiak nyapai penyulut,” ku iya.

Dennis mega minta genap sekula bebendar ngatur nembiak ke diajar sida, beduduk ari mayuh pekara negatif ngeruga ulah bala nembiak di luar sekula.

“Kelimpah ari penyulut ba akademik, pengajar mega patut nyeridi ulih nembiak ke diajar sida ngambika tau pintar berunding lalu ngaga pemutus enggau manah maya sida betapi enggau ulah negatif,” ku iya.

Bela bisi diatur nyerumba pengerami tu pengawa nyuaka setipikit enggau anugerah ngagai pengajar sereta mega ngagai raban staf ke pinchin.

Sekeda program bukai diatur ngerichahka pengerami malam nya iya nya belagu, mandangka tanda ari raban pengajar enggau enchabut tikit benasit.-Utusan Borneo