KUCHING: Mayuh agi pemansang deka digaga ba sitak Mambong pengudah sitak nya diberi nama baru, ti ari baruh pegai Kaban Kunsil Nengeri (ADUN) Bengoh suba,Datuk Dr. Jerip Susil.
Bengoh diatu dibagi ngagai dua iti sitak, iya nya Serembu (N18) enggau Mambong (N19), ke alai sitak Serembu mungkur Krokong, genturung pendiau di Serembu baka Siniawan, Paku, Tanjung Durian enggau genturung pendiau Melayu di Kranji, nyengkaum Sg Pinang (Kandis Baru enggau Kandis Lama).
Dr. Jerip madah, enti nitihka sitak Bengoh ke lama suba diatu dibagi ngagai dua, timur enggau barat, lalu semina ba kandang Bau aja agi ari baruh kuasa Bau, ku iya.
“Bau diatu udah dibagi dua, pengundi manggai urung 9,600 iku pengundi lalu tebal agi ari sida tu endang ari Bau empu. Nya alai, di Bau diatu bisi sitak Tasik Biru, Opar, Tanjung Datu enggau Serembu.
“Reti nya, bisi 4 iti sitak di Bau,” ku iya.
Iya madah munyi tu lebuh dikerandau pengarang berita pengudah bejadika atur pengawa Nyerah Dokumen Opis Pelilih Menua Tebedu, Opis Pelilih Menua Mit Siburan enggau Opis Pelilih Menua Mit Padawan ba Opis Pelilih Menua Mit Padawan semak ditu,kemari.
Ari sepiak Penrissen, iya nya sepiak sitak Mambong mungkur Puncak Borneo belabuh ari PULAPOL (Palan Pengawa Latih Polis) nyentukka Puncak Borneo ti tebal diuan bansa Bidayuh, Tabia (Kidin, Parang, Asom), nuju Anah Rais datai ngagai Simuti, Sadir, Sibakar, Sebyang, Kiding, Parang, Asom, Kekas enggau Bianah (ke kala dipegai Tarat suba).
“Tu mih pemar ke pemadu besai ke deka ditapi aku kelimpah ari beratika pemansang ekonomi di sitak tu dikemansangka nengah pemansang tanah Hak Adat Bumiputera (NCR),” ku iya.
Ku iya baru, pemerat Kepala Menteri Datuk Patinggi Tan Sri Adenan Satem ngangkatka Serian ari sebuah Pelilih Mit ngagai Bagi Menua, ngambika penyikap infrastruktur ulih dikemansangka di menua pesisir Kuching enggau Serian.
Kandang menua ti kala dipegai Tarat, iya mega Siburan Duras, Seratau,Sg Duuh, Masaan enggau Batu Gong enggau Duranda Emas ke mungkur urung 16,000 iku pegundi.
“Taja pan sitak aku mit tang sebagi besai ari sepiak Tarat kelebih agi sepiak ulu nya, Ulu Padawan bedau bisi sebarang pemansang infrastruktur baka,” ku iya.
Ba tanya pengarang berita sentang sekeda genturung pendiau sepemanjai tisi jalai Puncak Borneo ke lalu bedau bisi bekal ai paip, ku Dr. Jerip:
“Projek nyambung paip ke digaga ngena ungkus urung RM1.5 juta ari Punau nyentukka Derum, bisi udah tembu digaga lalu bisi sekeda nya bedau tembu,” ku iya.
Diatu Opis Kereja (JKR) baru deka nyerahka dokumen ari Indu Opis JKR ngagai Opis Pampang JKR ngambika pengawa nyambung paip ulih digaga, ku iya.
Ku iya baru, baka Kpg Benuk ti nyadi genturung pendiau ke pemadu besai lalu ngembuan urung 120 buah rumah diatu udah bisi elekterik ke digaga nengah Program Transformesyen Menua Pesisir ngena ungkus setengah juta.
Sama bisi enggau ngulu atur pengawa nya kemari, Ketuai Pupu Bansa Bidayuh Temenggong Austin Dimin.-Borneo Post
Post a Comment