MARUDI: Parti Progresif Demokratik Sarawak (SPDP) ditu mantaika diri ngenggaika ulah sekeda piak ke nguji ngasuh rayat tusut runding ti ngumbai SPDP nya parti penyakal, ukai komponen Barisan Nasional (BN).
Petenah ti baka tu balat ngasuh ati tekenyit, disakal pengari SPDP ke mega deka nyadi chalun SPDP–BN ba penuduk DUN Marudi, iya nya ex-Sekretari Mendam di Opis Menteri Dalam Menua enggau Pemansang Komuniti, Datu Dr Penguang Manggil, ti bela nerima tempias petenah nya.
“Semina bisi empat parti aja dalam komponen BN di Sarawak iya nya Parti Pesaka Bumiputera Bersatu (PBB); Parti Sa’ati Rakyat Sarawak (SUPP); Parti Rakyat Sarawak (PRS) enggau SPDP sereta 13 buah komponen parti BN di serata Malaysia.
Dr Penguang pechaya, endang bisi propaganda ke disadung sekeda piak madahka iya (Dr Penguang) nya pengari ari penyakal ngujungka raban ketuai komuniti baka sida pengulu enggau taui rumah nangi nyempulang pejalai iya tauka ngulu pengerami ke diatur SPDP ti disereta sitak nya.
“Pekara ti ditabur sida tu ti ngumbai aku ari penyakal nya endang bula. Nya ngujungka sekeda pengulu enggau tuai rumah nangi enggaika diketuka mangku pengawa, tu petenah ari sekeda piak iya ke ngumbai diri bisi kuasa,” ku Penguang nerang.
“Lalu kita empu tau meda dalam Opis Kaunsil Pelilih Mit Marudi (MDM), nadai seiku pan pengari ari SPDP dichiri mangku pengawa nyadi kaunsilor laban sida ti dichiri mangku pengawa nya orang ti nitihka singkang sekeda piak aja,” ku iya rambau bejaku maya Pengerami Pemesai Begulai Enggau Rayat nyerumba Pengerami Ngintu Taun Baru 2016 iya ke diatur beserimbai enggau pengerami makai selamat sereta kelai ngerami Wahid Sayun udah nerima anugerah Bintang Ahli Mangku Negara ‘AMN’ di Rumah Sayun, Sungai Arang, kemari.
Sama bisi datai ngulu pengerami nya, Sekretari PRS Bagi Menua Senadin, Egi Bangan King; Sapit Chairman SPDP Marudi, Tuai Rumah (TR) Benang Pilang, Chairman Ranting PBB Pampang Poyut, TR Hillary Tawan Achai, Ketuai Orang Indu SPDP Marudi, Theresa Gelang sereta Ketuai Komuniti iya, TR Sayun Galan. Berebak enggau nya, Penguang sekali agi madah, pengengkah parti nya sereta mega presiden iya, Datuk Seri Tiong King Sing, alai parti nya enda sesekali deka nerima Parti Tenaga Rakyat (TERAS) sekalika sida pulai baru ngagai SPDP tauka nyereta BN.
Bekenangka pekara bukai, Perintah Besai apin lama ke udah nengah Tiong ke mega Kaban Parlimen (MP) Bintulu, nyuaka agih belanja Bantu Khas ari Menteri Besai penyampau RM1.6 juta, lalu ku Penguang, agih belanja nya udah dipedua nengah chek ngagai sekeda Komiti Pemansang enggau Pengelikun Genturung Pendiau (JKKK), serakup enggau rumah panjai di kandang menua Marudi iya ke ditejuka ngelama tu.
Ari agih belanja nya, penyampau RM120,000 diungkupka ngagai Serakup Apai Indai enggau Pengajar (PIBG) sekula di pelilih Marudi, lalu penyampau RM18,000 diberi ngagai JKKK Rumah Sayun ti udah disua rambau pengerami nya.
Nyempulang pengerami ke sebaka, seiku pengajar madahka diri pengari PIBG Sekula Primari (SK) Sungai Arang mega bisi mantaika peminta bekal ai beresi disambung ngagai sekula sida lalu Dr Penguang nyaut madahka diri apin dipilih nyadi pengari rayat.
“Nama kebuah piak sekula nya enda minta bekal ai beresi sereta mantaika penanggul nya ngagai pengari rayat sida ke udah 20 taun mangku pengawa dia sereta udah dichiri nyadi Menteri Muda Rengka Rama (Bekal Ai).”-Utusan Borneo
Post a Comment