KUCHING: Kepala Menteri Datuk Patinggi Tan Sri Adenan Satem nyadang Pengawa Bepilih Nengeri (PRN) deka diatur ba bulan Mac 2016.
Bejaku ba pengerami ngintu taun baru 2016 ke diatur di Jematan Tol Tun Salahuddin, Petra Jaya malam ensanus, Adenan sekali agi minta rayat nengeri tu meri iya lima taun agi.
“Dalam timpuh 3 bulan agi kitai deka napi pengawa bepilih lalu aku minta rayat mega ngamatka semaya.
“Rayat patut ngamatka semaya meri aku timpuh lima taun agi nyadi Kepala Menteri ke alai aku keran deka nemu sekalika kita agi ngingatka semaya nya,”ku iya bejaku ngagai urung 15,000 iku ke datai.
Dulu agi ari nya iya madah diri udah ngamatka semaya ungkup rayat iya nya ngetuka bayar tol di jematan Tun Salahuddin.
“Malam tu aku datai ngamatka semaya ke disebut ba taun ke udah ke alai Jematan Lanang di Sibu pan nadai bayar tol agi ba bulan Mei suba.
“Semaya ke 2, iya nya ngetuka bayar tol Jematan Asean di Miri udah mega dikeamat ba bulan Jun suba.
“Diatu aku ngamatka semaya ke lumur tiga iya nya ngetuka bayar tol di Jematan Tun Salahuddin,”ku iya.
Ku iya nambah, aku udah ngamatka semaya ngurangka tarif lekterik, netapka bayar feri semina RM1 aja ba serata nengeri enggau mayuh pekara bukai.
Maya PRN ila ku iya, rayat patut ngamatka semaya ke alai Sarawak deka nyadi nengeri ke pemadu lantang.
Ba pengerami ke digulu raban kabinet menteri nya, Adenan mega netap iya deka bediri ngenanka penuduk Tanjung Datu.
Iya mega netapka Datuk Amar Abang Johari Tun Openg deka ngenan penuduk Satok, Dr Aldul Rahman Junaidi ngenan penuduk Pantai Damai lalu Sharifah Hasidah Sayeed Aman Ghazali ngenan penuduk Samariang.-BorneoPost
Post a Comment