PERENING SARAWAK: YB Marudi Sylvester Entri kurang didinga nyaut serebana rayat tang lebih agi milih betapuk di belakang bala tuai rumah ti nyukung ia.
Tabiat bakatu enda manah laban rayat deka ninga ari mulut pengari empu, ukai bala tuai rumah.
Rayat enggai ninga tuai rumah dalam hal projek pemansang ari YB sida lebih agi enti tuai rumah sigi ditemu baka uduk ti baka-kuit iku, dilah bejuntai ngeliur, ngelingi tuan nganti ti ditikau ruti kibin.
Sepatut ia, YB empu meh nerang ngagai rayat nama kebuah sekeda rumah panjai dua tiga kali nerima projek dalam setaun, tang sekeda lalu enda nerima nama-nama dalam dua-tiga taun.
Sida mega deka ninga penerang ari YB nama kebuah tuai rumah sida dibuai lalu diganti enggau urang ti enda dikerindu rayat.
Saut ka tanya bakatu udah tentu nadai ulih diterang bala tuai rumah, nya alai bisi endar penyelai nama kebuah Sylvester enggai muka mulut tang lalu majak ngansak bala tuai rumah jadi terabai ia.
Ketuai nembiak Sarawak Progressive Democratic Party (SPDP), Robert Ayu, empai lama ti udah bisi nyebut hal tu.
Ku ia, Sylvester patut berani mansut diri ari belakang bala tuai rumah lalu nyaut serebana rayat ti nyau enda tan agi udah lepas 20 taun dipegai ia tang lalu enda tetemu ka pemansang.
Badu bedindingka tuai rumah enggau councillor laban enti Sylvester deka bula, anang ngasuh sida uduk ia bula baka sida ti madah api letrik udah disambung ngagai menua Penan di Lapok.
Pengamai ia, tiang api letrik sigi udah bediri tetegih dua taun ke udah, tang api letrik lalu nadai disambung.
Nama kebuah, YB patut nemu, tang bala uduk ia udah ngaga pemula madah ngagai dunya lapok udah bisi api karan.
Ukai semina urang SPDP enda puas ati meda pemayuh rumah panjai ti lalu empai datai jalai alun, nadai letrik enggau aip paip, tang ketuai PKR Sarawak Baru Bian pin setuju menua sitak Marudi sigi bedau tentu ampit pemansang.
Seminggu-dua tu tadi, Baru bisi nemuai ngagai Marudi, nyadi ku ia, ba ujung jalai alun sepemanjai enam kilometre, Rumah Lansam, Sungai Dabai lalu empai bisi ai paip.
Ku ia, enti rumah panjai tisi pasar Marudi nadai ai paip, nadai jalai rumah panjai ke bejam-jam ari pasar bisi ai paip.
Bah nama ti dikebujat Sylvester? Enti ai paip ia enda teberi – ai ti kena urang nyumai, betuchi enggau mandi – nama utai ti digaga YB siku tu ti tau nyenang pengidup urang rumah panjai?
Tang sigi bisi rumah Panjai di Marudi ti amat senang pengidup – Rumah Entika.
Nama pemisi Rumah Entika?
Tu meh rumah panjai Iban kaya-raja pegai Sylvester laban di Rumah Entika tu bisi digaga raja tangki ai enggau siti tempat alai bilun engkabang terengkah.
Dini rumah panjai Iban lain bisi tempat bilun engkabang terengkah?
Aruh jalai alun lalu enda nyadi-nyadi laban lebig nyamai terebai ngena bilun engkabang!
Tang rayat nama penyadi? Tu meh kebuah rayat mai penyinu ati diri betemu enggau president SPDP Tiong King Sing minta tulung ia laban ti kelalu lama dikeduan YB Marudi.
Dunya jauh udah berubah. Enti sepuluh taun suba, engka enda kitai nemu penusah urang rumah panjai di ulu baka urang Penan di Lapok enggau sida di Rumah Mohsin Radin enggau Rumah Benang Pilang ti lalu nadai ampit pemansang.
Enti 10 taun lalu, YB enggau bala uduk ia ulih bula ka dunya ia meri pemansang chara rata enda bechiping.
Tang diatu, kitai dalam dunya Internet, dunya digital, nama ti kurang di Lapok, di Rumah Mohsin Radin, di Rumah Benang Pilang enggau bepuluh-puluh rumah panjai bukai di Marudi nadai ulih ditapuk agi.
Enti ka bula, ulih tang anang betapuk di belakang bala tuai rumah enggau councilor.-The Ant Daily
Post a Comment