MARUDI: Ex-Sekretari Mendam Opis Menteri Perintah Dalam Menua enggau Pemansang Komuniti ke mega Chairman Parti Demokratik Progresif Sarawak (SPDP) Pampang Marudi, Datu Dr. Penguang Manggil diperansang Presiden SPDP, Kaban Parlimen (MP) Bintulu, Dato Seri Tiong King Sing ngemataka sebarang penanggul ti ditapi peranak menua sitak nya.
Ku Penguang, sida seraban nyengkaum Ketuai SPDP mega bisi bejalai matau rampa menua kandang beberapa hari ke udah lalu bisi ngatur randau enggau sekeda Ketuai Komuniti bansa China ditu.
Ku iya, pengelama tujuh taun mangku pengawa ba opis menteri, iya udah suah bejalai gawa ngagai Opis Kaunsil; ari Lundu nyentuk ke Lawas, mendingka penangul ti bisi dikenataika raban staf lalu iya enda ngira pangkat laban deka mendingka semua.
“Enggau lurus ati aku madah, enti sema aku dipilih nyadi pengari rayat ba sitak tu, aku deka nyadi pengari ungkup semua raban bansa ke diau di kandang menua tu. Aku deka bekereja begulai enggau kita laban aku endang peranak asal menua tu, kala besekula ba Sekula Sekondari (SMK) Marudi dalam taun 1967, lalu aku udah berati, nadai mayuh ubah kenyau 40-50 taun ke udah. Aku enda besemayaka bulan enggau bintang tang aku minta sukung ari raban komuniti China maya pengawa bepilih tu ila.”
Ngenang sekeda penanggul ke ditapi peranak dia ku iya, Dato Seri Tiong balat ngemeratka sentang rampa menua lebih agi gaya jalai ke balat belubang lalu besemaya deka mutar sekeda penusah nya enggau jampat.
Penguang mega madahka diri, ke penudi gawa ba Opis Menteri nya lalu iya bisi dikangau bejalai ngagai Opis Kaunsil Pelilih Mit Marudi (MDC) sereta penatai iya dikelaluka Sekretari Kaunsil, Petrick Linggi Taboh.
Sama bisi datai maya nya Chairman SPDP Pampang Telang Usan, Wan Lah, Raban SPDP Marudi, Chua Pek Kang, Raban Parti Sa’ati Rakyat Sarawak (SUPP), Lau Kiang Lian sereta raban SUPP enggau SPDP ke bukai.-Utusan Borneo
Post a Comment