MARUDI: Kesemua empat Komponen Parti Barisan Nasional (BN) di pelilih menua nya meruan ngetanka penetap dijapai sida enda nyukung sebarang parti ari luar BN kelimpah ari Parti Demokratik Progresif Sarawak (SPDP) penggi sitak Kunsil Nengeri (DUN) Marudi rambau Pengawa Bepilih Besai Kunsil Nengeri ti Ke-11 (PRN11) tu ila.
“Semua bela nemu, sitak DUN Marudi tu asal endang dipenggi ngagai SPDP lalu kami udah bisi rintai nama chalun bediri ba sitak nya sereta iya tu ex-pemesai perintah; Datu Dr. Penguang Manggil kelimpah ari tujuh penuduk ke bukai ke diungkup ngagai SPDP iya nya Tasik Biru, Pakan, Krian, Meluan, Batu Danau , Bekenu, Marudi enggau Ba’ Kelalan.
Ketuai Nembiak SPDP Sarawak, Kr Robert Ayu mantaika pekara tu rambau Pengerami Pemesai SPDP Begulai enggau Rayat ke diatur Raban Nembiak SPDP sereta Parti Sa’Ati Rayat Sarawak (SUPP) Pampang Baram bepalan di Palan Sivik Baram ditu apin lama ke udah.
Kesemua empat Komponen Parti nya nyengkaum Parti Bumiputera Bersatu Sarawak (PBB), SUPP, Parti Rakyat Sarawak (PRS) sereta SPDP empu deka meda chalun baru ari SPDP bediri dia maya PRN11 tu ila lalu iya ke nyata chalun nya endang ari Parti BN bediri ba penuduk Marudi nya. Tu mih penetap runding ari tiga Komponen Parti BN ke bukai.
Kelimpah ari nya, Robert Ayu madah, gaya jalai Miri-Marudi ke chukup jai ngujungka pejalai semak tiga jam ngena kerita nengah jalai nya. Keterubah ku iya, kini penunga piak otoriti menua nya sereta kedua iya, sida ngenataika diri ngagai sitak Marudi ketegal deka mendingka peminta ari renggat nembiak redak raban bansa Melayu enggau China, iya ke deka berandau enggau ketuai ari SPDP laban sida ngasaika diri ditejuka piak otoriti menua nya.
Ketiga ku Ayu, Marudi tu dipenggi SPDP lalu endang patut SPDP ngasuh chlaun iya, Datu Penguang Manggil bediri ba penuduk nya.
“Aku ngelalau semua pengundi di Marudi enda bebagi sukung ngagai chalun tu. Iya kala nyadi Pemesai Kanan Perintah lalu iya ngembuan penelaba 36 taun bejalaika servis perintah. SPDP deka ngambi pulai baru sitak tu maya PRN11 tu ila.”
Robert Ayu mega dikirai nyadi chalun SPDP bediri ba sitak Mulu, baka ke udah dikeluarka ba media.
Sama bisi datai rambau pengawa nya, Presisden SPDP, Dato Seri Tiong King Sing, Kaban Parlimen (MP) Baram, Anyi Ngau, Sekretari Besai SUPP, Datuk Sebastian Ting, Sekretari Politik Kepala Menteri Sarawak, Alexander Asing Sadai, Sekretari PRS Senadin, Egi Bangat King, Ex-Kr Khalid Sabel (pengari PBB) sereta raban ketuai komuniti China nyengkaum Pemancha Chong Chin Hui, Pengulu Tie King Un enggau Kapitan Kang Siew Low sereta udah mujur ngempuruka urung iya 1,100 kaban SPDP sereta kaban BN ba palan sivik nya.-Utusan Borneo
Post a Comment