SRI AMAN: Raban ke dituntung penusah angus di tiga buah rumah panjai besemak enggau pangan diri di Peruan B, Sri Aman nerima pemeri bantu barang dapur ari Kaban Kunsil Nengeri (ADUN) Lingga, Simoi Peri kemari.
Simoi lebuhka dirandau raban media rambau bejalai ngabas raban nya ditu pagi tadi ngarapka sida ke dituntung penusah nya besabar nganti bantu ari perintah.
“Laban ke nyadi pengari rayat di kandang menua tu, aku deka bebendar mantu ngulihka belanja dikena mantu peranak rumah panjai iya ke dituntung penusah tu,” ku iya.
Simoi mega bisi nyuaka pemeri belanja penyampau RM500 sepintu ngagai 12 pintu ruang bilik iya ke dituntung penusah angus nya lalau penyampau kesemua iya RM6,000.
Berebak enggau nya, Opis Pekara Khas (JASA) Sarawak, DUN Lingga mega bisi nyuaka pemeri perengka sekula ngagai 23 iku nembiak sekula sekondari enggau primari iya ke dituntung penusah angus di rumah panjai nya nengah Program Membara (Kembali Kesekolah).
Tuju pengawa nyuaka bantu beg sekula sereta perengka ke bukai nya dikena nyaup ngelempungka tating penusah bala nembiak betapi enggau penusah angus ditu ti deka besekula baru minggu seiti tu ila.
Bela sama bisi datai rambau pengawa nyuaka pemeri nya Pemesai Pelilih Sri Aman, Ismawie Salleh, Pemesai JASA Parlimen Batang Lupar, Zaidel Ripin, Pengulu Joseph Lichong, Pengulu Mohd Salleh Abang Kawi sereta Kaban Komiti Parti Pesaka Bumiputera Bersatu (PBB) Lingga.
Rambau penusah ke nyadi urung pukul 7.14 lemai 26 Disember tu tadi, bisi 12 pintu ruang bilik mungkur Rumah Masir (tiga pintu) Rumah Ipan (lapan pintu) enggau Rumah Robert (sepintu) lalu mungkur 75 iku raban ke bela angus rumah. - Utusan Borneo
Post a Comment