MIRI: Rayat Sarawak patut meri mandat ngagai Kepala Menteri Datuk Patinggi Tan Sri Adenan Satem ngambika terus ngiring Sarawak dalam kandang lima taun agi.
Pekara nya dipansutka Pemerati Politik, Wan Zaid Syed Mohdzar laban nya deka meri awak ke mayuh agi endur Adenan ngatur pemansang ungkup nengeri tu.
“Aku pechaya dalam kandang lima taun ke deka datai tentu mayuh agi ubah baka ba sentang pengelantang pendiau rayat ke deka dipejalaika iya,” ku iya madah ngagai Utusan Borneo kemari.
Iya dipeda tampak rita sekumbang ke nyadi Kepala Menteri Sarawak, laban iya (Adenan) ngatur mayuh bengkah polisi baru ti meri pengelantang ngagai rayat mayuh.
“Laban ke nyadi rayat Sarawak, kitai patut meri mandat besai dikena ngemujurka iya mai pemansang ungkup nengeri tu kelebih agi ngagai kandang menua pesisir,” ku iya.
Kenu ku iya, Adenan nyengala penapat deka ngemansangka kandang menua pesisir di nengeri tu sekumbang ke udah mangku pengawa nyadi Kepala Menteri.
Kelimpah ari nya, ku iya Barisan Nasional (BN) nadai ngembuan penanggul begulai pengawa ungkup rayat kelebih agi di kandang menua pesisir di nengeri tu.
“Genap undi patut diberi ngagai BN laban BN ulih neruska agenda pemansang di kandang menua pesisir dalam timpuh ke lama,” ku iya.
Nangkan nya, Adenan mega dikearap ulih ngiring nengeri tu nyapai pemansang ungkup pengelantang rayat.
“Mayuh pekara manah ungkup rayat udah disebut Kepala Menteri lalu pekara nya bisi udah dipejalai taja semina lebih setaun udah ngiring ketuai di nengeri tu,” ku iya.
Adenan mega nyemetak madahka pasal pemansang ke digaga iya enggau chara berenggat di menua pesisir laban enggai meda rayat ngasaika diri dikemelu.
“Aku pechaya rayat Sarawak enda rugi nyema terus meri awak ngagai Adenan terus ngiring nengeri tu laban polisi ke dibai iya meri penguntung ngagai semua,” ku iya.
Sebedau nya, Wan Zain bisi mansutka penemu dalam randau enggau Bernama Tv madahka polisi ke dipejalaika Adenan diterima rayat Sarawak.
Nya kebuah, penampak rita Adenan nengah polisi ke dipejalaika iya majak mujur berindik ari sukung mensia mayuh nyengkaum ari raban bansa China.-Urusan Borneo
Post a Comment