KUCHING: Peranak Rumah Ngumbang, Jelau Atas Layar mantaika sebana sida minta perintah lengkas bejalaika pengawa lalu enda agi betangguh melakin jalai nuju ngagai rumah panjai sida.
Nitihka penerang ari Ketuai Parti Tindakan Demokratik (DAP) Betong Gerald Roger Anding madahka, Tuai Rumah Ngumbang bisi udah nerima agih geran projek mit menua pesisir (MRP) penyampau RM100,000 ungkup pengawa nya ba pengujung bulan nyin kemari.
“Ngelakka jalai mengkang jai, belubang kelalu lama nyau ngenusah pejalai peranak menua nya.
“Ninting hari sida nengah jalai nya ke pasar, begiga pemakai, nganjung anak sekula sereta pia mega dikena nganjung orang sakit ke sepital,”ku Gerald.
Gerald nambah sida udah nujah jalai tanah merah nya kenyau lima taun ke udah lalu ngarap nasit ulih diubah nengah geran MRP ke diterima.
Bedau lama tu tadi Gerald ke mega sekretari politik ngagai Chairman DAP Sarawak Chong Chieng Jen bisi nemuai ngagai Jelau Atas, Layar ke alai seduai meda jalai nya semina dipelakin semina urung 100 meter penyauh.
Jalai sepemanjai 2KM nya ku Gerald kala nerima agih belanja RM20,000 ari Perintah Barisan Nasional (BN) ba taun 2011 ungkup pengawa ngangkatmanah.
Gerald netap DAP disadang deka mai projek Impian Sarawak enti perintah mengkang enda kekebut ngaduka jalai nya.-Utusan Borneo
Post a Comment