Kitai deka meda PEBEDAS mujur nempa nembiak Dayak ngembuan penau, landik ngatur pengawa
JULAU: Gerempung Nembiak Dayak Sarawak (PEBEDAS) endang serak ke dikearap, ku Kaban Parlimen Julau Datuk Joseph Salang Gandum.
Laban ke semina seiti tu aja gerempung ukai perintah (NGO) nembiak Dayak di nengeri tu, ku iya PEBEDAS patut nyadi pelasar dikena ngemansangka bala nembiak.
“Kebuah pia laban kitai deka meda PEBEDAS nempa mayuh nembiak Dayak ke bisi penau lalu ulih ngereja semua utai.
“Reti nya beri sukung ngagai nembiak ngambika bepelajar, nemu pengawa rama sereta ngelala enggau nyentuk pasal main asal ke ditampung sida dudi hari,” ku iya rambau bejadi Pengerami Ngiling Bidai diatur PEBEDAS Sarikei di Balai Raya Mayuh Guna Julau kena malam Hari Enam ke udah.
Sama bisi datai Chairman Parti Demokratik Progresif Sarawak (SPDP) Meluan Belayong Jampung, Tuan D.O Julau Mohd Sa’aid Atoi, Pemesai Opis Pelajar Pelilih Julau Andrew Kana Rima, Chairman PEBEDAS Sarikei Minggu Rantai sereta bala tuai raban bansa ke bukai.
Pengerami tu digulu urung 400 iku pengabang seraya beperindang enggau penanyi Iban iya nya Lucy M. Salang ke mega nyadi Chairman Kaunsil Penyanding Penemu 1Malaysia Sarawak (1MSAC) madah, PEBEDAS patut siru mantu bala nembiak Dayak maju dalam komuniti.
Kenu ku iya, tu deka nentuka PEBEDAS tejapaika tuju penumbuh gerempung sida.
“PEBEDAS patut nentuka program ke udah dilanggur ulih meri pangka ngagai bala nembiak. Genap program ke diatur meseti bisi meri penguntung ngagai nembiak,” ku iya seraya nesau mayuh agi bala nembiak Dayak PEBEDAS.
Dulu ari nya, Minggu madah PEBEDAS tu pengempung bala nembiak Dayak ngambika enda pambar sereta dikemeluka ari pemansang.
“Nya alai, gaga PEBEDAS nyadi payung alai kita nukung sereta alai ngenataika buah penemu di nengeri tu,”ku iya.
Ba pengerami nya, Salang bisi madahka diri deka ngungkupka geran RM5,000 ngagai PEBEDAS Sarikei dikena mantu sida bejalaika program.-Utusan Borneo
Post a Comment