PERENING SARAWAK: Pedis amai meh Peace Party (PP) laban diperebut dua iku politician ti bela ngambu diri president partinya.
Enda semena-mena, penusah PP melepung laban state election ti nyau makin semak.
Sebedau tu, PP tenggelam, nadai didinga rita, nadai mega didinga bejalai kulu-kili ngiga members serta begaga ka ranting sebelah kampung enggau rumah panjai.
Kebendar ia, nadai mayuh urang nemu parti tu bisi. Enti enda ketegal nengeri kitai nyau deka bepilih, mayuh mensia enda nemu PP bisi, lalu bisi mega plan deka nganjung calun ba state election ke-sebelas tu lagi.
Dipeda enggau mata kasar, enti penusah president PP enda putus dalam sebulan-dua tu, nadai jalai partinya ulih enggau betanding.
Sapa ti amai president PP entara Pok Ungkut enggau Julian Petrus Jout?
Cherita ari sepiak Pok madahka sigi pin Pok bisi nganjung surat ninggal parti tang suratnya ditarit-balik serta membership ia dalam parti mega udah ditetap supreme council PP.
Pok jadi president labanka nganti Ting Jack Hui ti ngemadu dari lalu ninggal partinya.
Penerang ari Pok madahka annual report enggau list supreme council partinya udah dianjung ngagai ROS di Putrajaya dalam bulan lapan taun tu tadi.
Ni baka Julian tau nyadi president PP, enda mega ditemu iga, tang sebedau Ting jadi president, Julian sigi udah bisi ampit megai pengawanya.
Nitihka sekeda penemu, ia ngenudukka diri dia lebuh Ting ngemaduka diri.
Bagi Julian, mayanya Pok ukai member PP agi, nya alai ia nadai hak dalam parti, lalu nadai mega hak begagaka supreme council, nuduk ia empu nyadi president lalu nendang Julian ari parti.
Ni bagi cherita ti amai, ari Pok tauka ari Julian, semina ROS ulih nentu, tang selagi penanggul tu bedau putus, tusah amat Pok enggau raban ia deka masuk betanding dalam state election ti deka datai ngena lambang PP.
Tang bagi kita ti ngelala Pok, bisi ka enda PP, enti ia ka bediri, Pok siku mensia ti berani serta rajin nyalun diri dalam election, sigi pin enda kala menang. Anang ka menang, mulai duit chengkeram pin pedis!
Tusah ka nyagam nama kebuah urang baka Pok ka endar enggau urang jadi candidate.
Sida ke baka unggal Pok tu ukai sikit, nya kebuah tiap-tiap election, bisi aja kerusi ditanding sampai empat-lima iku chalun.
Bagi kitai ka ari luar, meda enggau mata kasar aja kitai udah nemu sapa bisi agi tau menang, lalu urang baka sida Pok enda nyalah semina ngeruh ai.
Sarawak dipelaba deka bepilih dalam bulan tiga, mayuh chalun, serta mayuh parti semina ngeruh ai.
Enti Pok amai-amai deka nurun bebai enggau 14 chalun PP munyi ti bisi disebut ia, amai ngeruh ia meh sida sebuat.
Enti baka ke bisi didinga ngelamatu, enti PBDS Baru enggau urang richuh, sida pin baka unggal Pok, datai ngeruh ai.
Iya ti ku aku, enti empai sedia, diau aja, gaga ranting chukup-chukup, keringka parti awakka urang ti pandai, ti bisi pemai, ti chukup tebilang tetarit ati masuk parti.
Anang semina enggau urang ngeruh ai.
-The Ant Daily
Post a Comment