MIRI: Bisi 72 iku nembiak bansa Penan keterubah nerima pelajar pra-sekula ba kelas palan nyeridi nembiak mit ke berengkah dibuka ensanus ba lima bengkah tumpuk pendiau Penan di Ulu Baram.
Menteri Muda Pengintu Pengelantang Pendiau, Pelajar Tumu Anak Mit enggau Pemansang Ruang Bilik, Rosey Yunus madah, lima bengkah tumpuk pendiau Penan nya mungkur Long Jenalong, Long Kerangan, Long Leng, Long Kawa sereta Ba Selulong di sepemanjai jalai paip gis Petronas Sabah enggau Sarawak di Tutoh/Apoh, Baram ditu.
“Kelas nyeridi nembiak mit tu sebengkah ari projek penengkebang ti dipejalaika di baruh Program Pelajar Komuniti ke dipelanja Petronas.
“Petronas di baruh komitmen Tanggungpengawa Rama Korporat (CSR) udah ngagihka belanja penyampau RM2.75 juta ungkup bejalaika program nya dikena nentuka raban nembiak mit Penan, beumur di baruh tujuh taun nerima pelajar pra-sekula baka nembiak bukai di nengeri tu,” ku iya madah ngagai raban media pengudah ngabas projek nya ke mungkur tumpuk pendiau di Ulu Baram ujung minggu nyin tadi.
Rosey madah projek penengkebang nya dipejalai begulai enggau Opis Menteri Pemansang Ruang Bilik, Orang Indu enggau Pengintu Pengelantang Pendiau, Opis Pemansang Mensia Mayuh (KEMAS), Opis Pelajar Sarawak (JPN), Kaunsil Pelajar Tumu Nembiak Mit Sarawak, Opis Residen Miri sereta raban ari opis enggau ejensi bekaul.
Ku iya nampung, agih belanja ungkup projek nya dalam kandang lima taun lalu palan nyeridi nembiak mit tu ila deka diberi ngagai KEMAS.
Di baruh projek nya, Petronas deka melanja pengawa nirika sekula baru, meri latih ngagai raban pengajar, raban penyanding penemu sereta perengka bantu ngajar.
Ku iya, projek nya nyerumba strategi pelin pemansang pelajar tumu nembiak mit dikena nentuka semua nembiak mit nerima pelajar tumu.
Rambau pejalai nya, iya puas ati enggau kelas ke udah disikap raban staf ke ngajar di palan nya.
“Tiap tumpuk pendiau disediaka kelas arau endur nyeridi nembiak mit. Kelas tu didirika laban pengawa ngaga begunan palan nyeridi di tumpuk pendiau nya benung ba tikas keretas kereja ngambika ditender ila.
“Pengajar disempulang seiku penulung udah dianjung gawa ba kelas nyeridi nembiak mit ba tiap tumpuk pendiau.”
Beduduk ari nya, iya meri besai terima kasih ngagai Petronas ketegal udah nyadika projek nya nyata laban ke nadai palan nyeridi anak mit tauka nembiak mit ungkup bala anak bansa Penan ke diau jauh di entigis Baram.
Bela nyempulang Rosey rambau pejalai nya, Senator Datuk Lihan Jok, Sekretari Kaunsil Pelajar Tumu Nembiak Mit Sarawak Early Dr Siti Zaliha Reduan sereta raban pengari ari Petronas.-Utusan Borneo
Post a Comment