Pia mega NGO Dayak sereta kitai ke bisi hak ba tanah NCR, anang enggai begempung enggau pangan diri
KUCHING: Serakup Dayak Sarawak (PEDAS) diuluka Ketuai Pampang (KP) PEDAS Kuching (PPK) James Saga Bayang sereta pengari ari PEDAS Pampang Bintulu (PPB) Igat Biju disempulangka Tukang Wang PPK Novert Sullang, bisi datai meri sukung pengawa becharaka tanah Adat Bansa Asal (NCR) Tuai Rumah (TR) Changgai Anak Dali ti ngarika sida semenua ari Sungai Sah, Ulu Niah, ba Kort Tinggi Kuching ditu.
Pechara tu dipejalaika entara Ranggong Anak Jenau sereta 11 iku ke bukai ngelaban kompeni BLD Resources Sdn Bhd (KTS Group) enggau Perintah Barisan Nasional (BN) Sarawak ngapil kes tu dibai bechara ngagai Kort Tinggi Kuching pengudah pemutus enda berat sepiak dijapai rambau pechara kes nya ba Kort Tinggi Miri taun 2013 suba.
Nitih penerang ari ex-Kaunsilor Jantai Anak Rabing madah ngagai KP James, pechara kes tu balat dipetalat ketegal kompeni ke ngaku tanah NCR alai sida TR Changgai semenua nanam sawit pengudah sida teulihka hak ngempu tanah nya ari Perintah Rajah Brooke kelia, maya iya bala sida tu nembiak redak dipegai TR Ranggong.
“Kaunsil Minyak Sawit Malaysia (MPOB) udah meri lisin nanam sawit ba tanah nya ngagai peranak rumah panjai dia. Opis Kaunsil Pililih Mit Subis mega bisi ngumpul levies ari kebun sawit sida. Tang BLD Resources Sdn Bhd ngaku deka nanam sawit ba atas tanah ke sama, baka ti udah digaga peranak menua nya. Nya alai, nama bida pengawa nanam sawit dikereja peranak menua nya enggau kompeni BLD tu?”
“Nama kebuah Perintah BN Sarawak meri pemendar ngagai kompeni BLD ngaga kebun sawit dandang besai ba tanah ti udah dikereja peranak menua nya,” ku ex-Kaunsilor Jantai nanya.
Nangkan nya, Kort Tinggi Kuching udah netapka pechara dilanjar ngagai 22 April 2016 tu ila pengudah pechara dipendingka urung sejam setengah pengelama kemari. Sida TR Changgai sebuat diarika luyar Harrison Ngau.
Berebak enggau nya, PEDAS ngarapka mayuh agi raban bansa Dayak di nengeri tu sedarka hak sida empu ba tanah NCR sereta mayuh agi datai meri sukung enggau peransang ngagai pangan diri maya betapi enggau penanggul ke bansa tu.
Pia mega PEDAS nesau semua bansa Dayak nyengkaum gerempung ukai dikuasa perintah (NGO) Dayak sereta raban orang ngatika diri bela besukung sereta meri peransang ngagai pangan diri ngangkatka bansa diri lalu anang alah laban ‘taju remaong’ sekeda piak ke semina deka nguna bansa Dayak ‘bebunuh tauka ngalahka’ bansa diri.
“Bela angkat mih semua kitai bansa Dayak selampur nengeri tu, niri negika pangan diri ngambika hak kitai tau badu dikachau dikeregau, dikeruga dipensena, dirusi dipenyati sereta dichiping piak ke nadai penyiru ngangkatka bansa kitai, bansa asal ari tiris pantis ti udah berimbaka kampung jerung di menua tu menya. Dani mih, angkat, udah kelalu lama bansa kitai ngayam mimpi.”-Utusan Borneo
Post a Comment