KUCHING: Direktor Opis Pelajar Sarawak Rokayah Madon madah, Ustaz ari Kelantan ti dichiri nyadi prinsipal ba sekula majoriti nembiak Iban, SMK Sungai Paoh deka bejalaika tanggung pengawa di sekula nya.
Iya madah, Kepala Menteri bedau lama tu tadi udah netapka pemutus sentang pekara nya lalu diterima komuniti ke diau ngelingi sekula.
“Beri awak ngagai iya bejalaika tanggungpengawa nyadi prinsipal dulu lalu kitai deka matau tusun pengawa iya,” ku Rokayah lebuh dirandau ba pengerami bejadika SK Matu Baru, Petra Jaya ditu, kemari.
Pemutus Opis Pelajar nyiri Ustaz Roslin Che Mat nyadi kepala pengajar di SMK Paoh, Sarikei pun bulan November tu tadi nerima bantah ari komuniti Iban ke diau besemak ke alai sida irauka bala anak dipejal megai pengarap Islam.
Ngenang sentang kes nya, Rokayah madah, tajapan Roslin seiku Ustaz ari Kelantan, tang iya udah lebih 30 taun gawa di nengeri tu lalu nemu pinta enggau peneka peranak asal ditu.
“Iya udah ngajar ba dua buah sekula di nengeri tu ke alai sida sebilik pan bisi enggau ditu.
“Ketegal ti udah lama diau ditu, kitai pechaya iya udah ngelala peranak asal menua tu enggau silik.
“Tang ketegal perintah udah meri pemutus, iya deka bejalaika tanggung pengawa nya lalu kitai deka matau tusun kereja iya nengah saup komuniti,’ ku Rokayah nambah.
Tusun pengawa perintah nengah opis pelajar ti nganjung pengajar kelebih agi raban ustaz ari Semenanjung Malaysia balat ngirau peranak nengeri tu pengudah sebengkah kes ke nyadi di SMK Lutong ba bulan March taun tu tadi.
Ba kes nya seiku nembiak Iban ke beumur 13 taun udah diasuh seiku pengajar ari Semenanjung Malaysia megai pengarap Islam enggau nadai pemendar ari apai indai iya.
Nitihka riput polis, nembiak indu nya dibai ngagai rumah pengajar di Kuala Baram lalu diak iya diasuh sembiang nitihka ajar Islam, pengudah nya iya diberi duit penyampau RM250.
Ukai semina diberi duit, nembiak indu nya mega diberi nama muslim sereta tag nama ke baru.-Utusan Borneo
Post a Comment