PERENING SARAWAK: Rayat di menua ulu, lebih agi sida ti dalam kerusi pegai YB ari Parti Tenaga Rakyat Sarawak (Teras) enggau United People’s Party (UPP), anang saru penemu dalam hal ni bagi parti Barisan Nasional (BN) lalu ni bagi parti ukai BN.
Ngelamatu sigi mayuh urang saru ngumbai Teras enggau UPP parti BN ketegal sekeda YB Teras enggau UPP agi jadi menteri penuh lalu bisi mega agi jadi menteri muda.
Sida ti agi jadi menteri tauka menteri muda tu meh udu nyarut runding rayat laban sida sigi madah, enti sida ukai urang BN, nadai agi dalam BN udah tentu sida dibuai kerja.
YB ari Teras baka pengari ari Pakan, William Mawan, Sylvester Entri (Marudi) enggau Peter Nansian (Tasik Biru), lalu pia mega YB ari UPP baka Wong Soon Koh (Bawang Assan) enggau Dr Jerip Susil (Bengoh) sigi kulu-kili madah parti sida parti BN lalu sida ia empu pin pengari BN.
Rayat tau amai saru laban ke ninga sida unggal Mawan, Entri, Nansian, Soon Koh enggau Jerip madah, enti kami ukai urang BN nama kami tu agi menteri, agi menteri muda, agi meri projek, lalu mega meri fund kena nyeruri rumah panjai, miki gereja enggau ngaga balai raya?
Pengamat ia, BN dalam Sarawak bisi semina empat parti – Parti Pesaka Bumiputera Bersatu (PBB), Parti Rakyat Sarawak (PRS), Sarawak United People’s Party (SUPP) enggau Sarawak Progressive Democratic Party (SPDP).
Nama-nama parti lain semua parti pemangkang tauka parti penyakal, nyengkaum Teras enggau UPP.
Tang Teras enggau UPP enda berani mangkang baka parti pemangkang bukai.
Bisi kebuah sida takut mangkang perintah.
Unggal Mawan udah ngasai pemedis mangkang perintah maya ia bediri ngarika DAP kelia. Pia mega Jerip enggau YB Engkilili Dr Johnical Rayong ti sama bela udah mangkang perintah sebedau seduai nemu bilik ba rumah panjai BN.
Sigi amat, BN tu baka kitai meda rumah panjai; dia meh bilik PBB, PRS, SUPP enggau SPDP.
Tang enda mukai-mukai, akih Mawan bebai enggau sekeda raban dalam SPDP keluar.
Pia mega Soon Koh, bebaika bala Dayak keluar ari bilik SUPP.
Tang keluar kini?
Udah tentu ninggalka rumah panjai BN, begagaka ka dunju, begagaka langkau sida empu.
Diatu kitai sama nemu, Mawan tuai dunju Teras, Soon Koh tuai langkau UPP.
Idup di dunju sigi enda nyamai, pia mega diau dilangkau. Nya meh kebuah Mawan enggau Soon Koh naka ulih minta nampung rumah panjai BN.
Ngelama sida bedampa kediri, Teras enggau UPP enda kala dibai BN meeting. Nama-nama polisi BN semina PBB, PRS, SUPP enggau SPDP nemu laban semina sida tu dikangau baum.
Sida ti lari tu tadi ukai lari sengapa tang lari bebaika reta tengkira SPDP enggau SUPP, nya meh kebuah enti reta tengkira tu enda dipulai, nadai jalai sida ulih nampil tauka nampung-nyambung rumah panjai BN.
SPDP enggau SUPP sigi ari pun terang-terang madah, lari ka terjun ka, anang bebaika keresa parti; enti bebaika ka pesaka parti, maya belaban, ngelaban BN meh kita.
Nya alai, dini-dini Teras deka nan kerusi, sida deka ditapi SPDP; dini-dini UPP deka bediri, sida tetap besatup enggau SUPP, laban SPDP enggau SUPP ngetanka reta tengkira BN ti dibai bala sida Mawan enggau Soon Koh terjun ari rumah panjai BN suba.
Teras enggau UPP enda tau disuruh menang laban enti sida menang sida menang ngelaban BN lalu ngurangka kerusi BN.
Jaku president PRS Dr James Masing empai lama ti udah bisi endar pengamai.
Ku ia, enti Teras enggau UPP amat amat rinduka BN, deka negap BN, badu meh bedampa baka kediatu tang mulaika diri ngagai bilik sida di rumah panjai BN suba.
Dr James mega madah, naka penyamai mutar penusah Teras enggau UPP. Enti bala sida Mawan enggau Soon Koh enggai besatup ngelaban BN ba state election ti deka datai, ta minta pulai ngagai SPDP tauka SUPP. Nadai jalai bukai.
Retinya, enti enda mulaika diri, mangkang meh Teras, mangkang meh UPP. Baka ka diatu.
Nya alai, badu Soon Koh madahka UPP parti BN. Badu Mawan madah Teras parti BN. Badu Sylvester ngemulaka rayat di Marudi madah ia enggau Teras ari BN lalu SPDP parti pemangkang.
Dini-dini UPP bediri, ia bediri ngelaban BN. Pia mega dini-dini Teras bediri, partinya bediri ngelawan BN.
Di Marudi enti Sylvester madahka ia ka bediri, ia bediri ngelawan BN laban Teras parti pemangkang.
Sapa-sapa ti dipadu SPDP bediri, nya meh chalon BN.
President SPDP, Tiong King Sing, udah bisi madah, SPDP udah setuju nganjung Dr Penguang Manggil maya bepilih nengeri ti ka datai.
Nya alai enti Penguang bediri, ia meh chalon BN. Enti Sylvester ngelaban ia, Sylvester ngarika pemangkang laban Teras ukai parti BN.
Nyadi, dini-dini UPP madah diri ka bediri, dini-dini Teras madah diri ka masang chalon, rayat anang agi keliru, badu agi charut penemu.
Ingat aja, UPP enggau Teras parti di luar BN, nya alai enti sida Soon Koh, sida Mawan, sida Sylvester madah sida deka bediri, sida bediri ngelaban perintah.
Di negeri Sarawak parti BN semina empat iti – PBB, PRS, SUPP enggau SPDP.-The Ant Daily
Post a Comment