Ngelama tu kaban Parti Progresif Demokratik Sarawak sigi nadai chalun ke dipilih nyadi kaunselor
KUCHING: Sekretari Besai Parti Progresif Demokratik Sarawak (SPDP) Datuk Anthony Nogeh minta kaunselor ngarika SPDP patut ngatur jurai enggau komponen parti BN bukai baka PBB, PRS enggau SUPP ngambika bisi alai bekunsi kuasa.
Nogeh madah ngelama tu SPDP sigi nadai chalun ke dipilih nyadi kaunselor.
“Ketegal nya, kami (SPDP) deka baum enggau PBB, PRS enggau SUPP bejuraika pekara nya. Udah nya kitai ngerintaika sekeda pengari PBB, PRS enggau SUPP, sebedau kitai sama milih.
“Kami begunaka urung 31 kaunselor ke deka gawa baruh Opis Kunsil Bau lalu kami deka bekunsi kuasa enggau komponen parti Barisan Nasional (BN),” ku Nogeh.
Iya madah munyi nya lebuh dikerandau pengudah bejadika atur pengawa Pengerami Makai Selamat YB Dato Henry Harry anak Jinep, ADUN N2 Tasik Biru’ ba Kelab Sukan enggau Rekreasi, Kampung Sudoh, Singai ditu, kemari.
Nogeh ti mega nyadi Sapit Menteri Betanam Betupi enggau Industri Pengawa Bumai Malaysia madahka kaul antara ADUN enggau iya empu terit, laban seruran bejuraika gaya pemansang ti patut digaga diak, nyengkaum pasal pangku pengawa kaunselor enggau ke bukai.
“Pilih sapa ke patut nyadi kaunselor, lalu kitai patut sama bekunsika kuasa antara kaban parti komponen,” ku iya.
Kelimpah ari nya, iya mega madahka jeman diatu ekonomi jauh berubah, lalu ngarapka rayat ulih ngangkatka ekonomi sida iya empu nengah pengawa dagang diri.
“Lalu baka nya mega, sekula sama berat, giga jalai dikena ngubah pengelantang pendiau diri empu,” ku iya.
Kelimpah ari nya, iya ngelalau tuai-tuai pupu bansa beratika pemerat genturung pendiau dijaga diri.
“Peratika pemisi genturung pendiau kita, lalu enti bisi pengurang, tulis surat ngagai kami (perintah),” ku iya.
Sebedau nya, Kaban Kunsil Nengeri (ADUN) Tasik Biru, Jinep ba jaku iya ngelalau tiap ruang bilik enda tau enda meransang anak sida iya masuk universiti.
“Tu ke pengabis berat jeman diatu. Aku empu deka ngaga ubah, rayat meseti berubah…Enda ulih agi nitih chara lama.
“Taja pan bisi sekeda orang enda rindu ke pekara nya, tang kitai enda tau enda berubah dulu, ubah idup kitai taja pan sekeda rayat enda rindu,” ku Jinep.
Pengawa nya kemari digulu urung 1,000 iku mensia mayuh nyengkaum raban ‘Big Bikers’ ari Kuching.-Utusan Borneo
Post a Comment