KUCHING: Sapit Kepala Menteri, Datuk Amar Abang Johari Tun Openg meri penyinu ati ngagai pemati ex-chalun PKR (Parti keadilan Rakyat) ba pengawa bepilih apin lama Bill Kayong, ti mati ditimbak di Miri pagi kemari.
Iya ngarapka pekara nya nadai kaul enggau politik, tambah mega ulah ti baka nya ukai ulah ke dikemeranka di nengeri tu.
“Kitai berasai sinu ati ninga berita ke nyadi di Miri ke alai seiku orang ke kala nyadi chalun PKR di Bekenu ditimbak.
“Aku enda nemu nama niat ba pekara nya, kitai enda nemu motif. Kitai sinu ati, laban ulah ti baka nya ukai ulah ke dikemeranka kitai, enti bekaul enggau politik nya ukai ulah kitai, kelimpah ari bisi kebuah bukai lalu aku ngasaika nya ukai motif politik.
“Kitai nyerah ngagai piak bekaul bejalaika pengawa nasat kes tu,” ku iya lebuh dikerandau pasal pekara nya kemari.
Pagi kemari, Sekretari PKR Miri Bill Kayong, 43 ditimbak mati lebuh ke ngetu ba lampu trafik di mua palan bebeli barang Emart di Tudan Miri.
Iya ke deriba Toyota Hilux kediri dipelabaka ditembak ari semak, ngujungka Bill dipelabaka mati ba endur penusah ke nyadi, urung pukul 8.30 pagi.
Nitihku bini iya, iya ari rumah nurun ngagai endur gawa di pusat bandar.
Bill mega sekretari Persatuan Dayak Sarawak (PEDAS) ti mega kala nyadi chalun PKR bediri minta pilih ngelaban chalun BN ba sitak Bekenu ba PRN apin lama.-Utusan Borneo
Post a Comment