KUCHING: Komuniti Dayak di serata nengeri tu, kelebih agi diperansang regas nyereta pemansang nengeri kelimpah ari chakah ngemansangka menua sida kelebih agi kandang menau pesisir.
Berebak enggau nya, ku Sapit Kepala Menteri Datuk Amar Doughlas Uggah Embas, komuniti Dayak enda tau enda ngemanahka kaul enggau pupu raban bansa sereta jalai pengarap bukai di nengeri tu ba penyerakup,ngambika nengeri tu ulih nyapai pemansang.
“Kitai patut nentuka kitai semua nyereta sereta regas ba pengawa kitai ngambika bulih penguntung ke sebaka ari semua program pemansang ekonomi enggau rama ke dibai perintah,” ku iya.
Iya bejaku munyi tu lebuh dikerandau pengarang berita ba Pengerami Nyambut Pengabang Hari Gawai ba rumah iya, di Taman BDC, ditu ensanus.
Ku iya baru, raban bansa mega patut sesingkang enggau pemansang ngambika rayat sereta nengeri tu ulih sama nyingkang nyapai status nengeri bepemisi besai.
“Enti kita mengkang begunaka pemansang di menua pesisir, kiti tau ngaga enti udah bisi ungkup belanja ke chukup.
“Tang deka ngulih jalai pengidup ti pemadu manah, kitai patut berubah, nyingkang lalu chakah agi gawa,” ku iya.
Kelimpah ari nya, iya ke mega Menteri Betanam Betupi Moden enggau Ekonomi Menua Pesisir madah, perintah Barisan Nasional (BN) chukup bebendar nyaguka Sarawak dalam semua sukut baka ke bisi dalam manifesto sereta fokus ngagai pemansang transformasyen menua pesisir.
Ku iya, kunchi besai transformasyen menua pesisir ngambika ulih nyapai juluk ti dikedeka, iya nya raban bansa enda tau enda regas sereta besaup.
“Nya alai, aku minta rayat kelebih agi di menua pesisir enda tau enda chakah gawa ngambika ulih nyapai pemujur baka orang bukai,” ku iya.
Berebak enggau nya, iya mega ngarapka raban orang bekebun, bumai nerima sereta nelebaka diri enggau chara betanam betupi moden kelebih agi ba pengawa ngelakuka produk sida ngambika teulih penguntung besai.
“Tu mih maya ke engkeman ba kitai meri terima kasih ngagai perintah enggau semua pengelebih nyengkaum pemaik ti dikemisika kitai diatu.Ungkup pengidup ke harmoni sereta penyerakup ti dikemisika kitai diatu ,” ku iya.-Utusan Borneo
Post a Comment