BETONG: Parti penyakal enda nemu tauka agi saru pasal tanah NCR ke endur Opis Betanam Betupi (JPS) bejalaika pengawa bekebun getah, ke alai pengudah timpuh lima taun, tanah NCR nya deka dipulaika baru ngagai orang ke ngempu tanah lalu status tanah nya agi NCR sereta mega agi diempu sida.
Menteri Industri Kebun Bedandang Besai enggau Komoditi, Datuk Amar Douglas Uggah anak Embas madah, tanah NCR ti udah endur bekebun getah ke dipejalaika nengah ‘Integrated of Agriculture Research for Development’(IRAD) deka diserah pulai ngagai orang ke ngempu tanah nya besereta enggau setipikit ti madahka timpuh bekebun getah pengudah pengawa nya tembu dikereja.
Ku iya, sebedau JPS ngereja tanah kebun nya, sida minta pemendar ari peranak rumah panjai nya ti ngujungka tanah nya lalu disukat kelingi.
“Pengudah nya dikereja tauka tembu dalam kandang 5 taun, tanah nya deka diserah ngagai pengempu disempulang enggau Setipikit Nyerah Projek tauka SPP.
“Dalam timpuh 5 taun, kunteriktor ke dipilih ngereja tanah deka bejalaika pengawa baka meresi palan,nanam sereta ngintu kebun nya dalam timpuh lima taun,” ku Uggah.
Kelimpah ari nya mega, tanah NCR ke udah ditulung JPS deka diberi subsidi urung RM13,500 sehektar dalam kandang lima taun nya.
Iya madah munyi tu lebuh bejaku ba Pengerami Bejadika Biro Indu di Rumah Panjai Matop di Spaoh, Betong ujung minggu nyin tadi.
Ku Uggah, tembu timpuh lima taun, tanah nya diserah pulai baru ngaga pengempu tanah nyengkaum diberi setipikit SPP laban tanah nya pesaka, reta kitai ke ngempu tanah.
Iya nimbal jaku penyakal munyi tu ti ngerembaika berita madahka setipikit ti dikeluarka nya dikena nukar status tanah NCR nya.
“Penyakal semina deka nyaruka penemu orang, tang menua kitai ditu enda charut enggau penemu sida.
“Kitai tetap nyukung parti Barisan Nasional (BN), kitai tetap enggai dikachau sida laban kitai sigi nyukung Perintah,” ku Uggah.
Di sitak Layar, Bukit Saban enggau Saribas, pekara tu ukai penanggul ke dikumbai penyakal penanggul ke besai.
Kelimpah ari nya, iya ngelalau mensia mayuh ke bisi sama ngulu pengerami nya numbuhka Gerempung Indu Matop laban Pengawa Bepilih Nengeri ke-11 deka diatur enda lama agi.
“Kita enda tau enda meri sukung, tulung, bantu penuh, ngagai sitak baru P24, dikena nentuka kerusi meri pemujur besai ngagai parti BN.
“Diatu kitai semak PRN bemacham cherita ke di dinga kitai, siti cherita suah dimain penyakal iya nya pasal tanah NCR,” ku iya.
Ku iya baru, di sitak menua Betong mayuh tanah NCR udah disukat.
“Ke menua ulu baka Ulu Rimbas, Ulu Paku, Ulu Layar, Ulu Spak, Ulu Padeh agi mayuh apin disukat sereta diberi surat tanah ari baruh Seksyen 18.
“Tang iya ke udah disukat diberi surat tanah ari Seksyen 6.
“Reti nya tanah NCR tu udah dikelala Perintah BN, lalu perintah udah melanja RM100 juta dikena nyukat tanah, lebih 735,000 hektar tanah di Sarawak udah disukat nengah Seksyen 6, lalu 500,000 hektar lebih udah di kelai,” ku iya.
“Kami di menua Ulu Paku din, menua kitai ditu enggau di Spaoh, di Semukut, di ili Serudit, Suri udah bisi pala tanah. Pala tanah tu diberi ngagai kitai nadai bayar, lalu idup selama iya,” ku iya.
Sama bisi enggau ngulu pengerami nya, Menteri Muda Pengelantang Pendiau Robert Lawson Chuat, ti mega ADUN Bukit Saban, Presiden Serakup Indu Dayak Sarawak (SIDS) Dato Sri Empiang Jabu enggau Tuai Rumah panjai Matop, Penghulu Richard Mulok.-Borneo Post
Post a Comment