KUCHING: Nengeri tu ngembuan mayuh penau dikena nempa diri nyadi sebuah menua betanam betupi ke ulih ngemansutka asil pemakai ungkup pengawa eksport kelimpah ke chukup diempa rayat ditu empu.
Kepala Menteri ti mega nyadi Penyandang Kunsil Nengeri (DUN) Tanjung Datu Datuk Patinggi Tan Sri Adenan Satem madah mayuh macham utai ke ulih ditanam sereta dijual tang kitai enda nemu ngemansangka industri tu.
“Mayuh macham produk kitai ari menua tu ke ulih dijual di renggat makit dunya, baka buah dabai, berau bario, madu engkelulut sereta produk bukai ke endang tebilang ditu, tang kitai enda nemu chara nyual sereta ngelakuka produk kitai nya,” ku iya.
Adenan madah munyi nya lebuh bejadika ‘Road to MAHA 2016 Renggat Sarawak Jelajah Pemungkal’ #MAHA2016 di Waterfront Lundu, ditu kemari.
Enti diperatika gaya tanah di Sarawak, kitai ngembuan tanah ke besai tang nadai utai ditanam, semina repa laban kampung aja,ku iya.
“Enti kitai ngereja tanah diri nengah pengawa betanam, kitai tau enda ibuh meli utai pakai ari menua luar.
“Uji peratika supermarket di Kuching tauka dedini barang supermarket ke ditemu kita, mayuh pemakai import ari menua luar, nadai mayuh produk ari menua tu ” “ empu,” ku iya lalu nandu baru, bill import kitai manggai bebillion Ringgit.
Iya ngelalau rayat menua Sarawak, anang ngemaruhka pengawa orang ke ngereja pengawa betanam betupi laban enti nadai sida tentu kitai deka suntuk pemakai.
“Enti nadai orang betanam betupi, nadai orang nupi chapi, pelaba aku kitai dijangka parai enda makai.
“Nya alai, anang sesekali ngemaruhka pengawa orang bumai, orang betanam betupi.
Kitai idup ketegal bisi orang bumai, betanam betupi taja pan asil bedau chukup,” ku iya.
Taja Sarawak 10 kali lipat pemesai ari nengeri Negeri Sembilan, tang Negeri Sembilan bisi 10 kali lipat pemayuh chapi ari kitai ke semina bisi 1 per sepuluh (1/10) aja.
“Lalu baka nya mega enggau berau…Taja pan kitai bisi bumai tang berau semampai enda chukup.
Enti sema bisi perang, ketegal kurang berau, parai meh kitai tu laban pungkang pemakai,” ku iya seraya bebuti.
Ba atur pengawa nya kemari, mayuh aktiviti bisi diatur baka pengawa pemandang MAHA ke pemungkal iya digaga di Lundu, Sarawak.
Sebedau tu, program tu kala digaga di Kuala Lumpur, alai pengawa pemandang ti digaga di Kuala Lumpur nyadi pengawa pemandang ke pengabis besai di Asia Tenggara.
Sama bisi datai, raban orang bumai, betanam betupi, sereta orang berikan.
Kelimpah ari nya, Adenan ti mega nyadi Chairman Barisan Nasional (BN) Sarawak madahka Statistik 2015 mantaika penyampau ungkus belanja ungkup pengawa import nengeri tu manggai urung RM4.3 juta ba pemakai aja, sereta ungkus berau di import manggai urung RM289 juta.
“Tu mandangka agi mayuh pekara ke patut digaga kitai dikena beratika pemakai menua tu meruan chukup.
“Kitai sama nemu penanggul bekal pemakai ke enda chukup nyadi penanggul ke ditapi menua di serata dunya,” ku iya.
Nitihka statistik dunya, dalam timpuh ke semak tu, pemayuh mensia dalam dunya tu manggai urung tujuh billion, lalu enti pemayuh mensia ke diau dalam dunya tu nyapai 9 billion (taun 2050 ila), Gerempung Pengawa Betanam Betupi sereta Pemakai (Food Agriculture Organisation tauka FAO) melabaka pengeluar pemakai patut ditambah urung 70 peratus.
Nya alai, ku Adenan, pengawa Perintah deka ngemutarka penanggul kurang bekal pemakai ke chukup sigi pama.
“Enti kitai semina bepanggai ba orang betanam betupi, sereta orang berikan, nya enda chukup,” ku iya.
Iya nandu, kitai ngarapka pemisi sektor pengawa dagang ke beranakka puku di menua tu ulih ngereja pengawa betanam betupi laban enti kitai semina ngarapka pemisi kitai diatu sigi enda chukup.
“Kompeni swasta mega dikearap nanam pukuk di tanah-tanah kitai ke besai di menua tu ngeluarka pemakai.
“Nya utai ke berat ti diguna kitai di Sarawak, ukai semina bekebun sawit aja laban kebun sawit kitai udah chukup mayuh.
“Ke berat, iya nya kebun alai bekebun pemakai dalam kebun dandang besai ti dikereja kompeni swasta,” ku iya, ke berunding deka mai kompeni besai beranakka puku muka kebun nanam utai pakai.
Dikena nyapai juluk tu ku iya, kitai beguana belanja tu chukup ari Perintah Besai dikena ngaduka pemansang infrastruktur pengawa betanam betupi, baka sistem parit, ku iya.
Sama bisi datai kemari, Sapit Kepala Menteri Datuk Patinggi Tan Sri Alfred Jabu, Menteri Industri Betanam Betupi enggau Bumai Dato Sri Ahmad Shabery Cheek, Sapit Menteri Industri Betanam Betupi enggau Bumai Anthony Nogeh, enggau bala bukai.-Borneo Post
Post a Comment