PERENING SARAWAK: Mayuh endar urang ba social media, lebih agi pangan Facebook, nanya nama kebuah Yang Berhormat ke lima iku ari PBB ti dijangka diketu sebedau state election ti deka datai, enda nyengkaum urang lumur dua Adenan Satem, ianya Alfred Jabu.
Luba sida madah, ari ke ningkil Gramong Juna di Machan, tauka Ambrose Blikau (Katibas), manah agi Jabu ditingkil.
Ku sida, ukai semina Jabu udah kelalu lama jadi YB, tang jadi Sapit Kepala Menteri pin udah lebih 20 taun.
Sepengelama ia jadi urang politik lumur dua, anang ngumbai ngemansang nengeri, Layar, sitak menoa pegai ia empu, lalu apin mansang. Mayuh rumah panjai lalu empai datai jalai alun, api letrik enggau ai paip.
Nama kebuah ngenan urang bakatu? Lapa enda buai aja? Kapa sayau ka duku ti tumpul?
Enti amai Adenan agi nguna Jabu, ukai tegal Jabu ulih mai pemansang ngagai rayat, tang awakka bisi ka terabai politik Adenan.
Jabu sigi nadai penemu ngemansang ka urang rumah panjai, urang menua pesisir, urang ke di ulu ai, sida ti di untak sungai.
Enti ia bisi pemandai bakatu, nadai kebuah menua ulu mengkang baka ia mungkal jadi Sapit Kepala Menteri kelia.
Tang enti jadi terabai Kepala Menteri nadai ulih ngelawan Jabu.
Lebih dua puluh taun ia jadi terabai Abdul Taib Mahmud. Maya beperang ngelaban PBDS kelia, Jabu meh paling tajam mulut, lebih pait ai liur, lebih rangkai batang rekung, bejaika ketuai bansa Dayak.
Lebih 20 taun mega nadai urang lebih landik ngenyamai ati boss baka Jabu – enggau jaku chukup manah serta sedap didinga boss, taja enda sedap didinga urang bukai.
Tang, kapa pedulika runding urang bukai? Ba Jabu, ia urang lumur dua boss, enti boss puas ati, ia mehnya.
Udah tentu boss puas ati, nyameh ngasuh politik Jabu mansang taja pin rayat lalu enda mansang, jalai alun lalu enda datai ngagai rumah panjai, api letrik enggau ai paip lalu enda disambung, skim padi ti ambu deka dibuka lalu enda dibuka, projek kepayang lalu lelingai baka urang mabuk makai kepayang, projek ‘deep freezer’ di Tarat ti lalu semampai baka tekang ais kena sumpah nyadi batu.
Enti amai Adenan agi ngetan Jabu, ukai semina polisi enggau projek pemansang baka kena pandul makai kepayang, tang rayat ti mabuk, ngelu pala, sakit ketegal enda nemu penyenang.
Adenan aruh nemu, enti ia amat-amat ka ngemansang rayat menua pesisir, sida di ulu, urang rumah panjai, anang arap Jabu ulih nulung ia. Udah terang Jabu enda ulih. Ia udah enda ulih dalam masa lebih ari 20 puluh taun.
Adenan madah ia deka mai mayuh agi pemansang dalam lima taun ti ka datai. Jabu gagal dalam 20 taun, nama antu ulih nulung ia mai pemansang dalam lima taun?
Adenan, umbas mehnya, badu arapka Jabu. Nuan bisi penemu nuan empu, nuan enda begunaka terabai baka Taib nguna Jabu jadi terabai ia.
Dalam lima taun ti ka datai, Adenan begunaka urang ti amat-amat berjiwa rakyat, bisi pengasihka mensia mayuh, ukai urang ti bechiping ati maya meri projek enggau grant.
Enti amai sida ka lima iku ti deka diketu munyika dipadah ba sekeda berita, empai chukup meh sida ti patut diganti ba state elction ti deka datai.
Tambah siku agi awakka jadi enam – tingkilka urang lumur dua.-The Ant Daily
Post a Comment