Chairman pengatur pengawa beripai sebedau tu Mabong Unggang madah, ngambika pendam nya dipeda beresi sereta tawas ari dibalut babas, kelimpah ari meri basa ngagai orang ke ditumbakka ba pendam nya.
Lebuh ti datai meresa baru pendam nya apin lama, iya bepenemu mayuh agi kereja deka digaga dia dikena nentuka pendam nya beresi sereta diibun enggau manah.
“Maya aku meresa pendam nya baru pengudah pengawa beripai 14 Oktober tu tadi, aku beratika agi mayuh pengawa ke patut dikereja enti bala agi bisi ati deka meda pendam nya manah agi.
“Baka kayu enggau rumput ti mati patut ditugung ba seiti endur sereta bisi sekeda endur nya enda ulih diperesi ketegal bisi indu gamang.
“Pendam nya deka tawas sereta beresi agi enti pengawa meresi ditandu baru. Aku arapka bala pemesai ba SDNU ulih berundingka pekara nya,” ku iya ti mega kaban Sarakup Dayak Iban Sarawak (SADIA) madah ngagai pengarang berita, apin lama.
Ba pengawa beripai keterubah ke diatur 14 Oktober tu tadi, bisi urung 300 iku orang datai meresi pendam SDNU tauka pendam Genda nya.
Pendam nya sebedau diberesi nitihku peranak setinggan ke diau ngenduh ba tanah SDNU nya madah, pendam nya endur nyamuk betelu, ular diau sereta endur bala penchuri belalai.
Pengari peranak setinggan ke diau ba pendam nya, Peli Junpot chukup meri terima kasih sereta temegah ati ngagai sukung enggau pengawa beripai ke udah diatur sebulan ke udah.
Peli juga ngarapka pengawa beripai nya agi ulih tauka suah agi dipejalaika dudi hari ila.
“Aku ngarapka pengawa beripai tu ulih diatur pemadu nadai pan sekali setaun.
“Ba penemu aku, pendam nya patut dipagar ngena dinding semin ngambika orang enda sengapa datai numbakka bangkai dia,” ku iya.-Utusan Borneo
Post a Comment
EmoticonClick to see the code!
To insert emoticon you must added at least one space before the code.