SARAWAK LIVE: Pelagus

Sitak Bukit Goram enggau Pelagus agi tubah begunaka pemansang infrastruktur

KAPIT: Sapit Menteri Pemansang Menua Pesisir enggau Kandang Menua, Datuk Alexander Nanta Linggi ngelalau bala pengundi di sitak Kunsil Nengeri (DUN) Bukit Goram enggau Pelagus terus nyukung sebarang chalun ke bediri ngarika perintah laban sida agi tubah begunaka pemansang infrastruktur.

Iya mantaika jaku tu maya bejadika pengerami numbuhka Unit Sungai Amang Sarakup Indu Dayak Sarawak (SIDS) ditu ujung minggu tu tadi.

Pengerami nya diatur di Balai Mayuh Guna Sri Baleh Kapit lalu udah digulu peranak Rumah Richard Engking Sungai Amang enggau Rumah Stewart Saba di Tatai Emas Sungai Amang Ulu di sepemanjai Jalai Selirik ditu.

“Aku minta bala pengundi ba kededua sitak tu terus nyukung perintah lalu nadai ngira sapa bagi chalun ke bediri ila laban kitai agi tubah begunaka mayuh pemansang kelebih agi pemansang infrastruktur.

“Perintah Barisan Nasional (BN) udah ngagihka mayuh belanja ngagai pemansang menua pesisir baka jalai, bekal ai enggau bekal elekterik,” ku Nanta.

Ku Nanta, ngenang penuduk baru N63 Bukit Goram sereta Murum di Belaga lalu tu peluang ti diberi ngagai sida ke diau di menua nya iya ke diuan 80 peratus peranak asal bansa Dayak Iban sereta sekeda raban bansa China enggau Melayu.

“Nya alai, nengah majoriti bansa Dayak ke diau ditu, aku pechaya manah agi kitai diarika bansa Dayak empu.”

“Diatu dipelabaka Parti Pesaka Bumiputera Bersatu (PBB) menggi penuduk tu. Ukai semina semua pengundi bansa Dayak aja, tang aku mega minta pengundi bansa China enggau Melayu patut terus nyukung Parti Rayat Sarawak (PRS), PBB enggau Parti Demokratik Progresif Sarawak (SPDP) dikena nentuka kitai ulih mayuh agi pemansang dipejalaika di menua tu,” ku Nanta nerang.

Pia mega ku Nanta, enti sema penyakal menang, sida deka napi pemar lalu iya enggai meda pengundi di Bukit Goram, Katibas, Pelagus, enggau Baleh ngundi penyakal laban sida agi tubah begunaka pemansang.

Ngelama tu ku iya, kami PBB endang ngereja pengawa begulai enggau raban ari parti komponen BN baka PRS; Tan Sri Datuk Amar Dr James Jemut Masing, Wilson Ugak Kumbong, Sekretari Politik Kepala Sarawak, Wilson Nyabong Ijang.

“Kami seruran begulai beraban ngereja pengawa dikena nentuka pemujur pejalai pengawa pemansang. Nya alai, aku minta rayat terus taluk ngagai perintah laban enti kitai begempung, kitai deka tegap lalu peminta kitai ba pemansang di Kapit deka dipendingka,” ku Nanta.

Dikena nangkup peminta ari raban SIDI, kaban Komiti Pemansang enggau Pengelikun Genturung Pendiau (JKKK) Rumah Richard Engking enggau JKKK Rumah Stewart Saba, Nanta bisi ngemendarka agih belanja penyampau RM 10,000 ngagai Indu Opis SIDS, RM 10,000 ngagai SIDS Unit Sungai Amang sereta penyampau RM 15,000 JKKK Rumah Richard Engking.

Ku Nanta, ngagai Rumah Stewart Saba, iya udah ngagihka belanja penyampau RM 75,000 ungkup pemansang infrastruktur asas.

Iya udah nya ngemendarka penyampau RM500 agi belanja ungkup sepintu ruang bilik ngagai 25 pintu iya nya dalam Program Bantuan Rakyat dikena sida ngentak rumah panjai baru.

Sama bisi datai Sekretari Politik Kepala Sarawak; Jefferson Jamit Unyat enggau Wilson Nyabong Ijang, Residen Kapit, Joseph Belayong, OCPD Kapit DSP Freddy Bian, Pemesai Opis Pampang Khas, ASP Chua Su Hua, Chairlady SIDS Kapit, Minor Panyau sereta SIDS Unit Sungai Amang, Anita Kambira, Tuai Rumah Richard Engking, Rumah Stewart Saba, sereta bala ke bukai.-BORNEO POST

Perambu pemansang menua pesisir muntang dipejalai enti rayat nyukung perintah BN: Jamit

KAPIT: Sekretari Politik Kepala Menteri Sarawak, Jefferson Jamit Unyat ngelalau peranak Rumah Ekau Baring, Batang Rajang ditu ngambi nyukung perintah Barisan Nasional (BN) dikena nentuka pengawa pemansang ulih dipejalaika enggau mujur nitihka perambu.

“Kitai semua bela nemu, kenyau ari lima taun penyakal, YB George Lagong, chalun ngatika diri menang maya Pengawa Bepilih Nengeri (PRN) 2011 suba megai Pelagus, rayat enda dikeibuh sereta betapi enggau pemar laban nadai sebarang projek Agih Pemansang Mit Menua Pesisir (MRP) dikemendar.

“Ngelama tu semua projek pemansang ke bisi dipejalaika nya diberi perintah nengah pengari rayat Datuk Alexander Nanta Linggi, ke mega Kaban Parlimen (MP) Kapit sereta Sapit Menteri Pemansang Menua Pesisir enggau Kandang Menua,” ku Jamit.

“Aku suah bejalai gawa betemu enggau peranak rumah panjai lalu meri penerang sentang polisi perintah sereta agenda pemansang lalu aku mega bisi nerima timbal ari renggat nembiak redak. Ketebal agi sida madahka diri nesal laban enda milih chalun Barisan Nasional (BN) lalu sida besemaya deka ngundi BN rambau PRN tu ila.”

Jamit madahka diri besai amat pengarap sitak nya sekali tu deka ngamatka semaya ngundi BN. Pejalai Jamit disempulang raban ketuai komuniti sereta penyukung komponen parti BN meri penerang sentang sitak bepilih ke baru ngagai peranak rumah panjai.

“Parlimen udah nerima pemutus numbuhka 11 sitak kunsil pengawa bepilih baru di Sarawak lalu rambau PRN tu, bisi 82 sitak enti dibanding sebedau tu semina 71 aja. Penuduk ke baru nyengkaum di Kapit; Murum enggau Bukit Goram.

“Bukit Goram tu diambi ari Pelagus di baruh P 215 Kapit lalu Murum tu ari Belaga di baruh P 216 Ulu Rajang. Diatu bisi enam sitak kunsil nengeri di Kapit; Murum, Belaga, Baleh, Pelagus, Bukit Goram enggau Katibas. Kapit mungkur nyauka satu per tiga pemesai menua Sarawak, bisi 11,400 iku rayat lalu enti dikira bisi tiga iku per kilometer sereta bisi 548 buah rumah panjai enggau tumpuk pendiau,” ku iya nerang silik.

“Gaya rampa menua bebukit tu meri pemar bejalaika perambu pemansang lalu nengah pengada dua sitak kunsil nengeri ke baru tu dikearap ulih ngemujur sereta bejalaika pemansang enggau manah,” ku Jamit.

Rambau PRN tu ila, Nyabong enggau Jamit bela minta ngagai semua pengundi di sitak nya ngundi chalun ke bediri ngarika BN. Raban parti BN sigi enda misah ari pangan diri lalu bekerejasama ngambi pulai baru penuduk ari penyakal lalu tejuka pengawa milih sapa bagi chalun ke patut bediri ngagai raban ketuai tinggi BN empu.

Nya alai, dikena nentuka BN ulih ngambi pulai baru penuduk Bukit Goram ari penyakal, kitai patut mantaika peminta ke terang ari raban pengundi di Kapit meri sukung penuh ngagai Kepala Menteri Tan Sri Adenan Satem laban polisi menua pesisir mai pemansang infrastruktur deka pulaika penguntung ngagai sida.

Berebak enggau nya, Tuai Rumah Ekau ngarika sida serumah enggau sida ke diau ngelingi genturung pendiau nya madahka sukung ngagai perintah BN.-Borneo Post